“Brentford”un son dönəmlərdəki əsas bombardiri, oyunlara pul qoyuluşu etdiyi üçün mayda 8 aylığa diskvalifikasiya olunan Ayven Touni ilk dəfə bu məsələ ilə bağlı geniş açıqlamalar verib.

"Football-plus.az" xəbər verir ki, 27 yaşlı forvard yaşıl meydana gələn il yanvarın 16-dan tez qayıda bilməyəcək. Komanda ilə birlikdə məşqlərə başlamasına isə yalnız sentyabrın 17-dən sonra icazə verilib. Ötən ilin noyabrında İngiltərə Futbol Assosiasiyası (İFA) ona mərclərlə bağlı reqlamentin 232 dəfə pozulması halına görə ittiham irəli sürdü. 1 aydan sonra müəyyən oldu ki, qaradərili futbolçu 2017-nin fevralından 2021-in yanvarına qədər daha 30 oyuna pul qoyuluşu edibmiş. Bugünlərdə “The Diary of a CEO” adlı “yutub” kanalının qonağı olan Touni hər şeyi olduğu kimi danışıb. Yeri gəlmişkən, Touniyə “ludomaniya” (oyun asılılığı) diaqnozu qoyulub. Həm bu xəstəlik, həm də günahını açıq şəkildə boynuna alması onun diskvalifikasiyasının 15 aydan 8 aya qədər endirilməsinə səbəb oldu.

* Belə şeylər yeniyetmə yaşlardan başlayır. Əvvəlcə oynayırsan ki, azacıq qazanasan. Mən 15 yaşımdan oynamağa başladım. Yaşım irəlilədikcə, hər şey daha da pisləşməyə başladı. Çünki çox pul qazandıqca, mərcə də daha çox pul atmağa başlayırsan. Əmin idim ki, uduzsam belə, faciə deyil. Çünki gələn ay udacağıma inanırdım.
* Tədricən bu, sadə bir hobbi çərçivəsindən çıxmağa başladı. İFA-nın mənə qarşı irəli sürdüyü ittihamlarda elə oyunlar var idi ki, onları, ümumiyyətlə, xatırlamırdım. Amma onları da boynuma götürməyə razı oldum. Çünki bu məsələyə birdəfəlik son qoymaq istəyirdim. Bu hadisə mənə və karyerama ciddi zərbə vurmaq üzrə idi. Ötən mövsümün gedişində heç də yaxşı hisslər keçirmirdim. Düzdü, 20 qol vurdum və əla performans sərgilədim. Amma mənlə bağlı aparılan araşdırma üzərimdə çox böyük təzyiq yaradırdı. İnsan bu işə qarışanda onun pis tərəfləri haqda düşünmür. Pul qoyuluşu edən adamı yalnız bu işin yaxşı tərəfi və pul maraqlandırır.
* Mərclərə o qədər aludə olmuşdum ki, maaş alacağım günü səbirsizliklə gözləyirdim. Pulumu alan kimi ordan lazım olan şeylər üçün müəyyən məbləğ ayırırdım. Qalanını isə yalnız bukmekerlərə xərcləyirdim. O vaxt düşünürdüm ki, bu pullar mənimdi. Onları mən qazanmışam və istədiyim kimi də xərcləyə bilərəm!
* Bəziləri idda edirdi ki, mən danışılmış oyunlara pul qoyuluşu edirdim. Xeyr, həyatım boyunca danışılmış oyuna pul qoyuluşu etməmişəm. Əvvəllər öz oyunuma pul atırdım. Məsələn, pul atırdım ki, oyunda birinci qolu özüm vuracam. İFA rəsmilərinə izahat verərkən, onlara heç vaxt yalan danışmamışam. Sadəcə, elə oyunlar var idi ki, mən həqiqətən ona pul qoyuluşu edib-etmədiyimi xatırlaya bilmirdim. Mənə o qədər çox sual verirdilər ki... Dediyim kimi onlarla əməkdaşlıq edirdim və yalnız həqiqəti danışırdım.
* Bu söhbət ortaya çıxandan sonra özümü çox üzgün və incimiş hiss edirdim. Mənə elə gəlirdi ki, kimsə qəsdən İngiltərə yığmasına yolumu bağlamaq istəyir. Yəni bütün bu yaşananları beynimdə məhz belə görürdüm. Məni cəzalandırmaq istəyirdilər. Çünki yığmada oynamağın ən böyük arzum olduğunu bilirdilər. Bu azmış kimi, məni diskvalifikasiya da etdilər. Mənim üçün ən böyük cəza dünya çempionatından kənar qalmağım oldu. Fikrimcə, bu söhbəti ortaya atanlar zamanı da bilərəkdən seçdilər. Axı mövsümün gedişində bunu etmək nəyə lazım idi? Onsuz da mövsümün sonunda diskvalifikasiya olundum. Bu, mundialla bağlı idi. Çünki bu boyda təsadüf ola bilməz.
* Bir dəfə restorana getmək istədim, amma məni içəri buraxmadılar. Şoka düşdüm və bunun səbəbini soruşdum. Yenə də pul qoyuluşu mövzusunu və ya ona bənzər məsələni bəhanə gətirdilər. Bu hadisə mənə o qədər pis təsir etdi ki, onu sözlə ifadə etmək çətindi. Bir müddət özümə gələ bilmədim. Çünki pul qoyuluşu etməklə restoran arasında bir əlaqəni tuta bilmədim. Daha bir dəfə şirkətlərdən biri maşınımı sığortalamaqdan imtina etdi. Yenə də pul qoyuluşu ilə bağlı yaşanan qalmaqal üzündən. Onlar, sadəcə, istəmirdilər ki, mənim soyadım onların şirkəti ilə yanaşı hallansın.