Ölkəmizin futbol üzrə milliləri ilə bağlı xəbərləri bir araya topladıq.

"Football-plus.az" həmin xəbərləri diqqətinizə çatdırır:

* Əsas millinin baş məşqçisi Canni de Byazi “TUTTOmercato”ya açıqlama verib. İtaliyalı mütəxəssis yaxın gələcəyi ilə bağlı fikirlərini bölüşüb: “Biz AÇ-2024-ün seçmə mərhələsinin Belçika ilə oyunu ərəfəsində işimizi davam etdiririk. AFFA ilə müqaviləm dekabra qədərdi, sonrasına baxacağıq. Düzünü desəm, İtaliyaya qayıtmaq haqda düşünmürəm. Prioritet xaricdə qalmaqdı. Ola bilsin ki, milli komandada işləməyə davam etdim”.
Yığmanın AÇ-2024-ün seçmə mərhələsi çərçivəsində noyabrın 16-da İsveç və 19-da Belçika komandalarına qarşı keçirəcəyi oyunların stadionu və başlama vaxtı müəyyənləşib. İsveçlə qarşılaşma Tofiq Bəhramov adına Respublika stadionunda keçiriləcək. Belçika yığması ilə də “King Baudouin Stadium”da münasibətləri aydınlaşdıracaq. Qeyd edək ki, hər iki matç Bakı vaxtı ilə saat 21.00-da başlayacaq.
* Bakıda seleksiya xarakterli təlim-məşq toplanışını yekunlaşdıran 19 yaşadək futbolçulardan ibarət yığma hazırlıq çərçivəsində növbəti yoxlama oyununu keçirib. 1-ci liqa təmsilçisi “İmişli”ylə qarşılaşan yeniyetmələr 2:3 hesabıyla uduzub. U-19-un heyətində Yaqub Yusubov və İbrahim İbrahimli fərqlənib. Xatırladaq ki, milli ilk oyunda MOİK-lə heç-heçə etmişdi – 2:2.
* 15 yaşadək futbolçulardan ibarət yığma Estoniyanın paytaxtı Tallində təşkil olunan UEFA İnkişaf turnirində növbəti oyununu keçirib. Təmsilçimiz Estoniyanın müvafiq yaş qrupundan ibarət komandası ilə qarşılaşıb. Oyun rəqibin 2:1 hesablı qələbəsi ilə başa çatıb. Milli turnirdə növbəti görüşünü sabah moldovalı yaşıdlarına qarşı keçirəcək. Qeyd edək ki, İlham Yadullayevin rəhbərlik etdiyi U-15 turnir çərçivəsində ilk oyununda Bosniya və Hersoqovinanın müvafiq yaş qrupundan ibarət komandası ilə qarşılaşıb. Rəqib əsas vaxtı qolsuz bitən matçın penalti seriyasında daha dəqiq olub – 3:2.