"Rakuv”la oyundan sonra yaşananlar hələ də gözümün önündədi.

Hamı "Qarabağ”ı, Qurban Qurbanovu, əsasən də rəhbərliyi qınayırdı ki, klub transferlərə pul xərcləmək istəmir. Əslində haqlı idilər də. Çünki komanda Çempionlar Liqasında mübarizəni dayandırmışdı. HİK-i mübarizədən kənarlaşdırmaq çətin görünürdü. Dəyişiklik lazım idi. Qurban Qurbanov ən azı kollektiv daxilində yaşanan psixoloji problemin öhdəsindən gəlməliydi. Təcrübəli mütəxəssisin işi çətin idi. Şahruddinin səhvləri üzündən komanda uğur əldə edə bilmirdi, ictimaiyyət bunun məsuliyyətini də baş məşqçinin üzərinə qoyurdu.

Media, futbol ictimaiyyəti "köhlən atlar”ı tənqid edirdi. Qurban Qurbanov dəyişikliyə "Rakuv”la oyundan sonrakı mətbuat konfransında başladı. 51 yaşlı çalışdırıcı ilk dəfə komandasının uğurlar qazandığını, 19 yaşlı futbolçunu Çempionlar Liqası kimi turnirin təsnifat mərhələlərində meydana buraxdığını dilə gətirdi. Uzun illərdi Ağdam təmsilçisinin başında duran məşqçi əvvəlcə öz səhvlərini anladı. Başa düşdü ki, bu topluma uğurları sadalamaq, gördüyü işləri demək lazımdı.

Şəxsən mən həmin konfransda transferlərin komandaya gec uyğunlaşmasından, gələn kimi fayda verməməsindən şikayətçi olmuşdum. Qurban Qurbanov bunu qəbul etmiş, verəcəyi cavabın özünümüdafiə kimi səslənəcəyini dilə gətirmişdi. Mütəxəssis HİK-lə oyunlarda özünə və kollektivdəki bəzi futbolçulara son şans vermişdi. O, ümid edirdi ki, Şahruddin bu qədər tənqidlərdən sonra özünə gələ bilər. Düşünürdü ki, Abbas Hüseynov tez sağalar, Marko Veşoviç ağlını başına yığar, Toral Bayramov sağ cinaha uyğunlaşar, Hamidu Keyta özünə gələr, Nəriman Axundzadə daha yaxşı inkişaf edər. Amma nafilə. Əlində olan kollektivə mərhələ keçsə də, səhvlər olduqca çox idi. Yaşananları sadalamağa gərək yoxdu. Nələr yaşandığını hamınız gördüz.

Bundan sonra yeni layihə üzərində plan quruldu.
Əvvəlcə uzun müddətdi danışıq aparılan Andrey Lunyovlə rəsmi müqavilə imzalandı. Bu transferlə ictimaiyyətin incikliyi bir qədər azaldı. Daha sonra sağ cinahda həm müdafiəçi, həm də yarımmüdafiəçi kimi çıxış edə bilən Mateus Silvanın keçidi rəsmiləşdi. Artıq bu planın görünən tərəfi idi. Srağagün "Olimpiya" ilə görüşdə Luka Quqeşaşvilinin qapıda dayanması çox şeydən xəbər verirdi. Nəhayət, Silva 15 dəqiqə meydanda olsa da, hansı səviyyədə futbolçu olduğunu nümayiş etdirdi.

Bəs Qurban Qurbanovun planı nədi? Təcrübəli mütəxəssis hər mövqedə üç keyfiyyətli futbolçunun olmasını istəyir. Çünki komanda üzvlərinin tez-tez zədələnməsi onu buna məcbur edir. Artıq "köhlən atlar”ın 4 qolkiperi var. Yəqin bunlardan biri "transfer pəncərə”si bağlanana kimi icarəyə veriləcək. Böyük ehtimal bu, Amin Ramazanov olacaq. Müdafiənin solunda isə 2 eyni səviyyəli yerli müdafiəçi var. Onların sırasına qışa kimi bir legioner qoşula bilər. Elvin Cəfərquliyevlə Toral Bayramov yaxşı futbolçular olsalar da, burda əcnəbi futbolçunun da olması Qurban Qurbanovun əlini daha da gücləndirəcək. Müdafiənin mərkəzində isə hansısa problem yoxdu. Burda Kevin Medina, Bədavi Hüseynov, Bəhlul Mustafazadə, Rahil Məmmədov var. Bu 4 futbolçu həm çempionat, həm də avrokubok matçları üçün yetərli sayıla bilər. Silvanın gəlişindən sonra sağ cinahdakı problem də həllini tapdı. Sentyabrın sonuna kimi Abbasın da zədəsinin sağalacağını nəzərə alsaq, işlər qaydasına düşəcək.

Onsuz da Veşoviç komandanın əsas sağ cinah müdafiəçisidi. Kapitan Maksim Medvedev də çempionat oyunlarında komandaya kömək olsa, bəs edər. Dayaq və mərkəz yarımmüdafiəsində də hansısa problem yoxdu. Burda 5 futbolçu var. Bunlar Julio Romao, Patrik Andrade, Riçard Almeyda, Marko Yankoviç və Nihad Quliyevdi. Yarımmüdafiənin solunda da problemin yaşanacağını düşünmürəm. Abdulla Zubir, Redon Cica və Hamidu Keyta bu mövqedə kifayət qədər effektli futbolçulardı.

Qurban Qurbanov pleymeyker kimi istifadə edə biləcəyi futbolçu isə azdı. Düzdü, Yassin Benzya yavaş-yavaş özünə gəlir. Yeni transfer Juninyo komandaya uyğunlaşmağa başlayıb. Lakin Benzyanın tez-tez zədələnməsi işləri bir qədər qəlizləşdirir. Qurban Qurbanov böyük ehtimalla bu mövqe üçün bir transfer edəcək. Sağ cinahda da hansısa problemin olduğunu düşünmürəm. Çünki burda Leandro Andrade, Adama Diakabi və Nəriman Axundzadə kimi oyunçular var.
"Qarabağ”da ən problemli bölgə hücum xəttidi. "Köhlən atlar”ın heyətində sırf forvard kimi çıxış edə bilən oyunçu yoxdu. Bəli, Redon Cica, Hamidu Keyta, Juninyo və Nəriman Axundzadə bu mövqedə çıxış edə bilir. Lakin adını çəkdiklərim həmin effekti vermir.

Əldə etdiyim məlumata görə, "Qarabağ" bu mövqeyə oyunçu axtarır. Ağdamlıların danışıq apardığı oyunçular var. Sentyabrın 5-nə kimi bu yöndə addım atıla bilər. Lakin Qurban Qurbanovun istəyi kollektivə qoşulan kimi fayda verə biləcək oyunçunun transfer edilməsidi. Bu səbəbdən də axtarış davam edir. "Transfer pəncərəsi" bağlanana kimi Ağdam təmsilçisi iki hücumçu transfer etsə, təəccüblənməyə dəyməz.

Bir sözlə, Qurban Qurbanov "Qarabağ”da yeni mərhələnin təməlini qoyur. Artıq "köhlən atlar”ın heyətində hansısa oyunçunun inkişaf etməsi, özünə gəlməsi gözlənilməyəcək. "11-liy”ə düşməyə layiq olan şəxslər meydana çıxacaq.

İLKİN SULTANLI