“Milan” və “Platense” arasında aparılan danışıqlar sona çatıb. İtaliya klubu çoxdan hədəfə aldığı Marko Pelleqrinonun transferini rəsmiləşdirib.

“Football-plus.az” xəbər verir ki, argentinalı müdafiəçi yeni klubu ilə müddəti 2028-ci ilin yayına qədər nəzərdə tutulan müqavilə bağlayıb. O, “Milan”da “31” nömrəli formanı daşıyacaq. Tanınmış jurnalist Canluka Di Martsio 21 yaşlı futbolçunun milanlılara 3,5 milyon avroya başa gəldiyini, müqavilədə bonus kimi Argentina klubuna daha 2 milyon avro çata biləcəyini xəbər verib. Razılaşmanın digər şərtinə əsasən, “Milan” Markonun digər kluba satışından əldə edəcəyi təzminatın 10 faizini “Platense”nin xəzinəsinə köçürməli olacaq.
Pelleqrino bu klubun yetirməsidi. Bu il debüt etdiyi əsas komandada keçirdiyi 17 oyunda 1 qol vurub.