“Mançester Yunayted”in vingeri Meyson Qrinvud indi bazarın ən matah fiqurlarından biri ola bilərdi (“transfermarkt” 2021-ci ildə onu 50 milyon avroya dəyərləndirmişdi).

Yəqin həm də doğma komandasının əsas heyətində oynayardı. Əsl gəzən bədbəxtlik olmasaydı. “The Athletic” 2023-ün martında onun haqqında belə yazırdı:
• Qrinvud komanda yoldaşlarını “zibil” adlandırıb;
• Ronaldo haqda təhqiramiz ifadələr işlədib (məlum müsahibəyə qədər);
• “Siti”yə gedəcəyi ilə bağlı MY-ni şantaj edib;
• karantin qaydalarını pozub.

Və ən əsası – 2022-nin yanvarında rəfiqəsi Harriyet Robsonu döyüb və zorlayıb. Ondan sonra Qrinvudun karyerasında fasilə yarandı. Polis təhqiqata başladı. Həmklubları Meysondan uzaq durdu, sponsorlar üz çevirdi, MY “hadisənin bütün təfərrüatı araşdırılana qədər” məşqlərdən kənarlaşdırdı. Araşdırma bir il sonra – 2023-ün fevralında başa çatdı. Qrinvudla bağlı cinayət işini qəfil qapadılar. Krallıq prokurorluğunun təmsilçisi “The Mirror”a müsahibəsində izah etdi ki, hakimiyyət orqanları Meysonu həbsə atmaqda perspektiv görmür: “İndiki halda (Qrinvud işində - red.) aparıcı şahidlərin və yeni materialların öyrənilməsi o anlama gəlir ki, futbolçunu mühakimə etməyin real perspektivi yoxdu. Bu üzdən cinayət işini bağlamağa məcburuq”.
Burda vacib məqam odu ki, Qrinvud bəraət qazanmayıb. Onun rəfiqəsini döyməsi və seksual zorakılığa məruz qoyması faktlarını özündən başqa heç kim inkar etmir. Odu ki, imici təmizlənməyib. Cinayət işinin qapanmasına görə isə prokurorluq nümayəndəsinin dediyi məqama - “yeni materialların gün üzünə çıxmasına” minnətdar olmaq lazımdı. Çox güman, döyülmüş Robsonun yenidən Qrinvudun yanına qayıtması və hətta hamilə qalması (yeri gəlmişkən, ötən ay uşaq dünyaya gəlib) nəzərdə tutulur. Yəqin ki, zərərçəkənlə barışmaq futbolçunun azadlığını xilas etdi. Ancaq bu məqam başqa problemlərin həlli deyil – karyerası hələ də təhlükə altındadı.

Maaş və alıcılar
Xatırladaq ki, cinayət işinin qapanması Qrinvudun günahsız olması anlamına gəlmir. O gerçəkdən qanunu pozub. Prokurorluğun fəaliyyətindən isə daha çox itirdi, nəinki qazandı. Axı ictimaiyyətin gözündə cəzasına çatmayan cinayətkar kimi qaldı. Odu ki, buna qədər futbolçunu komandadan uzaqlaşdıran “Mançester Yunayted” rəhbərliyi pis vəziyyətdə qaldı. Və qərarını dərhal açıqlamamaq üçün “daxili təhqiqat” ifadəsi altında gizləndi. Təhqiqatın sonuna qədər status-kvo qorundu – Qrinvud məşq etməsə də, maaş (həftədə 70 min funt) almağa davam etdi. Britaniya mətbuatına inansaq, uzun-uzadı çəkən təhqiqat hansısa məqamda Qrinvudu bezdirib. O, cinayət işi qapanandan bir neçə ay sonra anlayıb ki, bir daha MY-nin şərəfini qorumaq imkanı olmayacaq. Klubda bu mövzuda müyyən şübhələr hökm sürsə də, məşqçi korpusu (Erik ten Haq qarışıq) hesab edirdi ki, Qrinvudla birdəfəlik üzülüşmək lazım deyil. Bununla paralel futbolçunun arxasınca müştərilər düşməyə başladı. Şayiələrə inansaq, təkcə may və iyun ayları ərzində Meysonla “Milan”, “Yuventus”, “Atalanta” maraqlanıb, “qırmızı şeytanlar” isə onun İtaliya, Türkiyə və ya Yunanıstan klublarına icarəyə verilməsini gözdən keçirib. Ancaq nə iyulda, nə də avqustun ilk yarısında transfer danışıqları hansısa konkretlik qazanmadı. Cinayət işi ləğv olunandan yarım il sonra belə görünürdü ki, MY Qrinvudu qaytarmaq istəyir, ancaq imicinə mümkün qədər xələl gəlmədən bunu necə edəcəyini bilmir. Məhz bu məqam klubun ləngliyini izah edə bilər. “Qırmızı şeytanlar” Meysonun dönüşünü elə formalaşdırmaq istəyirdi ki, heç kim inciməsin. Bu yalnız nəzəriyyə idi, ancaq avqustun ortalarında “The Athletic”də işıq üzü görən yazı nəzəriyyəni tam təsdiqlədi.

Bosslar saxlamaq istəyir, qalanı əleyhinədi
“Mançester Yunayted”in daxilində yaşanan proseslərlə bağlı şübhəli şəkildə çox şeydən xəbərdar olan Amerika nəşrinin yazdığına görə, daxili təhqiqat gözdən pərdə asmaqdan başqa bir şey deyil – klub rəhbərliyi işi hərtərəfli öyrənməkdən daha çox Qrinvudu komandaya necə qaytarmaq üzərində düşünüb. Rəhbərliyi anlamaq olar – müqavilənin birtərəfli pozulması kluba ciddi məbləğ (8 milyon funt sterlinq) bahasına başa gələcək, elə qiyməti 50 milyon avroya çatan futbolçu özü də hədsiz böyük maliyyə itkisidi. Meysonu saxlamaq üçün futbol səbəbləri də kifayət edirdi. Ten Haq mətbuat konfranslarının birində səbəbləri belə çatdırmışdı: “Markus Reşforddan başqa bizə qol vurmağa qadir daha bir oyunçu lazımdı. Akademiyanın yetirməsi olacaq və ya kimisə almaq lazım gələcək – bunun əhəmiyyəti yoxdu”. Baş məşqçi Qrinvuda ehtiyac duyub-duymaması ilə bağlı suala belə cavab vermişdi. Odu ki, formal cəhətdən qərar çoxdan verilib. Sadəcə, MY artıq bir neçə dəfə daxili təhqiqatın nəticəsinin açıqlanmasını ona görə ləngidib ki, ictimaiyyətin hücumlarını dəf etmək yönündə hazırlaşsın. Və klub buna necə lazımdı hazırlaşıb. Hər şeyi xırdalıqlarına qədər hesablayıblar: Qrinvudun şəklinin necə çəkiləcəyindən tutmuş Ten Haqın futbolçu haqda sualı necə cavablamalı olduğuna qədər. Məişət zorakılığına qarşı mübarizə fondu kimi problemli təşkilatlarla, həmçinin qadınlardan ibarət komanda və xanım azarkeşlərlə işin necə qurulacağı da detallı şəkildə düşünülüb. Ancaq yuxarıda adı çəkilən nəşrin informasiyasına görə, hər şey plan üzrə getməyib. MY-nin bir qrup əməkdaşı bossları Qrinvud kluba dönəcəyi təqdirdə gedəcəyi ilə təhdid edib. Qadınlardan ibarət komanda narahatlığını çatdırıb, dünyanın hər yerindən olan azarkeşlər “Yunayted”in baş direktoru Riçard Arnolda qəzəbli məktublar yazıblar. Tanınmış şəxslər də bu kampaniyaya qoşulub – məsələn, məşhur britaniyalı teleaparıcı Reyçel Rayli bəyan edib ki, Qrinvud heyətə qaytarılsa, bir daha “şeytanlar”a azarkeşlik etməyəcək. Britaniyalı millət vəkili Zara Sultan da kəskin çıxışla yadda qalıb. Vəziyyət o qədər mürəkkəb, qəzetin yazısı o qədər kəskin olub ki, “Mançester Yunayted” özünə bəraət qazandırmalı olub. Klubun açıqlamasında deyilir ki, “The Athletic”də yer alan yazıya baxmayaraq, Meysonla bağlı qərar hələ verilməyib. Amerika nəşrində yer alan plan əslində aylar öncə tərtib olunan çoxsaylı ssenarilərdən biridi, klub problemin həlli üzərində işləyir və tezliklə hər şey bitəcək. Əlbəttə, mankunianlar sonda hansı qərarı verirlər-versinlər, uğursuz olacaq. Bir tərəfdən, Qrinvuddan imtina istedadlı yetirməni və xeyli vəsaiti itirmək deməkdi. Digər tərəfdən, futbolçunun dönüşü elə bir qalmaqala səbəb olacaq ki, onu yatırmaq çətin olacaq. Ola bilsin, “The Athletic”də yer alan yazı onsuz da çətin olan durumu bir qədər də mürəkkəbləşdirdi, ancaq indi bizə yalnız son qərarı gözləmək və hadisələri müşahidə etmək qalır.

P.S. Son qərarı çox gözləmək lazım gəlmədi. MY-nin rəsmi saytı vasitəsi ilə yaydığı açıqlama Meysonun taleyinə aydınlıq gətirdi: