MS-nin ilk, Qvardiolanın isə 4-cü superkuboku
Avqustun 16-da avrokubokların 2023/24 mövsümünün ilk qalibi müəyyənləşdi.
"Football-plus.az" xəbər verir ki, Avropa Superkubokunun (AS) Yunanıstanın Pirey şəhərində keçirilən oyununda “Sevilya”ya qalib gələn “Mançester Siti” bu turnirdə ilk uğurunu reallaşdırdı.
Mançester Siti - Sevilya 1:1 (0:1, 1:0), p. - 5:4
Mançester Siti (İngiltərə): Ederson, Uoker, Akanci, Qvardiol, Ake, Rodri, Kovaçiç, Palmer (Alvares, 85), Foden, Qriliş, Holann.
Sevilya (İspaniya): Bunu, Navas (Montyel, 83), Bade, Qudel, Akunya, Xordan, Rakitiç, Okampos, Torres (Xuanlu, 74), Lamela (Suso, 90+3), Ən-Nəsiri (Mir, 90+3).
Qollar: Ən-Nəsiri, 25 (0:1). Palmer, 63 (1:1).
Penalti seriyası: Holann – 1:0. Okampos – 1:1. Alvares – 2:1. Mir – 2:2. Kovaçiç – 3:2. Rakitiç – 3:3. Qriliş – 4:3. Montyel – 4:4. Uoker – 5:4. Qudel – 5:4 (tir).
Vərəqələr: Bade, 33. Lamela, 62. Xuanlu, 90 - sarı.
Hakim: Fransua Letesye (Fransa).
16 avqust. Pirey. 29207 tamaşaçı.
“Georgios Karaiskakis” stadionundakı matçdan bir neçə gün əvvəl İngiltərə Superkuboku oyununa çıxan “Mançester Siti” penalti seriyasında “Arsenal”a uduzmuşdu. Xosep Qvardiolanın komandası Avropa Superkuboku matçının da favoriti sayılırdı. Amma De Bruyne, Silva və Diaş kimi aparıcı oyunçuların zədə səbəbindən meydana çıxa bilməyəcəyi Avropa Liqasının son qalibi “Sevilya”nın işinə yaramaya bilməzdi.
Tale bu dəfə İngiltərə çempionunun üzünə güldü. İlk dəqiqələrdən təşəbbüsü ələ alan “şəhərlilər”in cəhdlərini Bunu heçə endirirdi. Amma hesabı açan tərəf müdafiə olunan İspaniya klubu oldu. Akunyanın cinah ötürməsini tammalayan Ən-Nəsiri pireneyliləri önə keçirdi. Bundan sonra daha çox geri çəkilən Xose Luis Mendilibarın komandası üstünlüyünü fasiləyə qədər qoruya bildi.
İkinci hissənin ilk 15 dəqiqəsi sevilyalıların diqtəsi ilə keçdi. Okampos ingilislərin müdafiəsinin sağ cinahında tez-tez problemlər yaradırdı. Ən-Nəsiri onun iki əla ötürməsindən birini qola çevirə bilsəydi, nəticə böyük ehtimalla fərqli olardı. Amma “Sevilya”nın aparıcı hücumçusu şansları boşa verdi. Və 63-cü dəqiqədə Qvardiolanın komandası rəqibi bədxərcliyinə görə cəzalandırdı: Rodrinin ötürməsi ilə Palmer hesabı bərabərləşdirdi. Dərhal hücuma atılan Mendilibarın komandası qələbə qolunu vurmağa çox yaxın idi. Lakin Ederson Ən-Nəsirinin zərbəsinə əla reaksiya verdi. Qalan vaxtda üstünlük “Siti”nin tərəfində olsa da, Bunu ilə Navas inamlı oyunları ilə mübarizəni yeni qaydaya əsasən əlavə vaxt olmadan penalti seriyasına daşıdılar. Bu sınaqdan qalib çıxan MS bu il azarkeşlərinə daha bir qələbənin sevincini yaşatdı.
Faktlar
* “Sevilya” 7-ci dəfə iştirak etdiyi AS matçında 6-cı məğlubiyyətini aldı. Komanda bu turnirdə yeganə qələbəsini 2006-cı ildə “Barselona” (3:0) üzərində qazanıb.
* MS AS-də ilk dəfə qalib gəldi.
* MS tarixində 33-cü kubokunu qazandı. Komanda 9 dəfə İngiltərə çempionatında, 7 dəfə ölkə kubokunda, 8 dəfə Liqa kubokunda, 6 dəfə İngiltərə Superkubokunda, 1 dəfə Kuboklar Kubokunda, 1 dəfə isə ÇL-də qalib gəlib.
* Qvardiola AS-də 4-cü qələbəsini qazanmaqla Karlo Ançelottinin rekordunu təkrarladı. İspaniyalı mütəxəssis qitə superkubokunu daha əvvəl
iki dəfə “Barselona” (2009, 2011), bir dəfə isə “Bavariya” (2013) ilə başı üzərinə qaldırmışdı. Ançelotti bu kuboku iki dəfə “Milan” (2003, 2007) və iki dəfə “Real”la (2014, 2022) qazanıb.
* Qvardiola AS-də üç klubla qalib gələn ilk məşqçi oldu.
* Qvardiola məşqçilik karyerasında 36-cı titulunu qazandı. O, “Barselona”nı 14, “Bavariya”nı 7, MS-ni isə 15 turnirdə qələbəyə daşıyıb.
Oyundan sonra
Xosep Qvardiola, “Mançester Siti”nın baş məşqçisi:
“Ötən həftə “Arsenal”a penalti seriyasında uduzmuşduq, bu dəfə belə bu seriyada qalib gəldik. Palmer üçün bu oyun heç də asan keçmədi, amma o, işinin öhdəsindən məharətlə gəldi. Ən-Nəsirinin zərbəsi heç də ideal deyildi. Amma həm onun, həm də Okamposun yaratdığı epizodlar bizim üçün dəhşətli oldu. Yaxşı ki, Ederson komandamızı bir neçə məqamda qoldan xilas etdi. İkinci hissənin əvvəlindən topa daha çox nəzarət etməyə başladıq. Sona yaxın cavab qolunu vurduq və son dəqiqələrdə qələbə qoluna nail olacağımıza inanırdıq. “Sevilya” qapımızdan ikinci topu keçirsəydi, vəziyyətdən çıxmaq bizim üçün çox çətin olardı. Bu komanda yüksək səviyyəli oyunçulardan qurulub. Əvvəllər komandamız tez-tez titul qazananda hərdən motivasiya yetərsizliyini hiss edirdim. Amma bu dəfə belə hissiyatım olmadı. Yeni mövsümdə ilk titulumuzu qazandığımız üçün çox sevinirik”.
Xose Luis Mendilibar, “Sevilya”nın baş məşqçisi:
“Siti” kimi çox yaxşı komandaya qarşı yaxşı plan qurmaq çətindi. Komandamın belə rəqibi daha çox təzyiq qarşısında qoymasını istərdim. İkinci qolu vurmaq üçün qazandığımız şansları dəyərləndirə bilmədik. Buna baxmayaraq, yaxşı oyun sərgilədiyimizi, daha çox təhlükəli vəziyyət yaratdığımızı düşünürəm. “Siti” adətən hər oyunda azı bir qol vurur. Bunu bilirdik və qələbə üçün azı iki qol vurmalı olduğumuzu anlayırdıq. Təəssüf, buna nail ola bilmədik”.
Digər xəbərlər
