Heyətdə ciddi zədə problemi ilə üzləşməsinə və ən son Edin Visçanı itirməsinə baxmayaraq, mövsümə qələbə ilə başlayan “Trabzonspor”la bağlı yeni məlumatlar var.

“Football-plus.az” xəbər verir ki, öncə qeyd edək ki, yunanıstanlı dayaq yarımmüdafiəçisi Emmanuil Siopisin klubdan ayrılacağı ilə bağlı xəbərlər rəsmi təsdiqini tapıb. Artıq karyerasını bu klubda davam etdirmək istəməyən 29 yaşlı futbolçu Trabzondan ayrılıb. Amma qaradənizlilər bu ayrılıqdan 500 min avro qazanıblar. Belə ki, Siopis müqavilənin qarşılıqlı şəkildə ləğvi üçün kluba 242500 avro təzminat ödəyib. Bundan başqa, futbolçunun meneceri də klubun ona olan 257500 avroluq borcundan imtina edib. Bu ayrılığın daha bir diqqətçəkən tərəfi var. Siopis dekabrın 31-nə qədər Yunanıstan, Səudiyyə Ərəbistanı, BƏƏ və ya İngiltərədən birinə yollansa, “Trabzonspor” daha 700 min avro, Türkiyədə qalıb başqa kluba keçsə, “Trabzonspor” daha 2 milyon avro qazanacaq! Qeyd edək ki, Yunanıstan yığmasının üzvü olan Siopis 2021-dən “bordo-mavililər”in şərəfini qoruyurdu. 77 rəsmi oyuna çıxan təcrübəli oyunçu superliqa çempionluğu və Türkiyə superkuboku olmaqla 2 titul qazandı.

Maraqlıdı ki, “Trabzonspor” Siopisin ayrılığından cəmi bir neçə saat sonra heyətini Yunanıstan yığmasının daha bir üzvü ilə gücləndirdi. Söhbət Taksiarkis Funtasdan gedir. Amma Siopisdən fərqli Funtas hücumameyilli oyunçudu. Ən son ABŞ təmsilçisi “DiSi Yunayted”də forma geyən və azad agent statusuna malik 27 yaşlı oyunçu ilə üçillik müqavilə imzalanıb. Daha öncə “Panionios”, “Asteras”, “Sankt Pelten” və Vyana “Rapid”ində çıxış edən bu futbolçu 2022-dən bəri karyerasını ABŞ-da davam etdirirdi. O, “DiSi Yunayted”də forma geydiyi 38 qarşılaşmada 18 qol vurub. Xatırladaq ki, Yunanıstan yığmasının kapitanı Anastasios Bakasetas da “Trabzonspor”dadı.

Bu arada qaradənizlilər Rayyan Baniyanın da keçidini tamamlayıb. Transferin detalları daha sonra açıqlanacaq. Baniya İtaliyada doğulmuş 24 yaşlı türk və beninəsilli mərkəz müdafiəçisidi. “Verona”nın yetirməsi olan və İtaliyanın aşağı liqa klublarında çıxış edən bu futbolçu 2021-dən bəri “Fatih Karagümrük”ün şərəfini qoruyurdu. 194 sm boya malik olan Baniya son iki mövsümdə İstanbul klubunun heyətində 33 rəsmi oyuna çıxaraq 2 qol vurub.