“Baş məşqçimizin dediyi kimi “Kəpəz”lə oyunun təxirə salınması üçün PFL-ə müraciət etdik. Lakin qurum bunu qəbul edərək “yox” cavabını verdi. Çempionatın təşkilatçısı qeyd etdi ki, sizin oyun da daxil olmaqla heç bir qarşılaşma təxirə salınmayacaq”.

“Ümumiyyətlə ilk turda hər hansı təxirəsalma ilə bağlı rəsmi müraciət edilməyib. Ola bilər ki, bu və ya digər klubların nümayəndələri ilə şifahi danışıq olub. Amma bu işlər rəsmi şəkildə edilir və həmin müraciət də olmayıb. Ümumilikdə ilk turla bağlı təxirəsalmalar arzuolunan deyil. Biranlıq düşünək ki, 1-ci həftədə “Sabah”la “Qəbələ” qarşılaşmır. Belədə bütün avrokuboklarda iştirak edən klublarımızın görüşlərini təxirə salsaq, çempionatı bir oyunla başlamalıydıq. Bunu təsəvvür edirsiz? Belə davam etsək, ümumiyyətlə, gərək təmsilçilərimiz mübarizəsini dayandırana qədər və ya davam edənə qədər təxirəsalma edək. Bütün bunlar yaxşı hallar deyil, həm daxili yarışlarda, həm də beynəlxalq miqyasda eyni anda bir neçə günlük fasilələrlə mübarizə aparmaq futbola xas haldı. 10 komandalı, 36 turlu yarışda isə çempionatı gec başlamaq kimi bir komfortumuz yoxdu. Gec başlayanda təqvimdə sıxlıq yaranır, hətta bir sıra klublar 5 günlük oyun təqvimini belə sıx hesab edirlər ki, bu da hələ bizim üçün qaranlıq məqamdı. Çünki oyunlar arasında 48 saatlıq fasilə olanda beynəlxalq qaydalara əsasən futbol oynamaq lazımdı. Biz maksimum yardımçı olmağa çalışırıq. İstənilən təxirəsalma elə həmin klubların da planlarını pozur. Bir sözlə, istənilən təxirəsalmanın müsbət olduğu kimi, mənfi tərəfləri də var. Məqsədimiz avrokubokda çıxış edən klublara dəstək verməkdi. Çünki orda müsbət nəticələr Azərbaycanı və onun futbolunun reytinqini yüksəldir. Amma bunun da bir çərçivəsi olmalıdı”.