Deyirlər ki, Avropa mədəniyyəti dünyaya örnəkdi. “Köhnə qitə”də baş verən ümumbəşəri inqilablar planetimizin formalaşmasına təkan verib. Ümumiyyətlə, zadəganlar daha çox Avropadan çıxıb. Avropa futbolun mədəniyyət beşiyi sayılsa da, burda kobud və hörmətsiz insanlar da çoxdu. Son iki həftədə iki dəfə bunun şahidi olduq.

“Neftçi” Konfrans Liqasının 2-ci təsnifat mərhələsin cavab görüşündə “Jelezniçar”ı 2:0 hesabıyla məğlub etməklə mübarizədən kənarlaşdırdı. Oyundan sonra qonaqların çalışdırıcısı Nermin Başiç mətbuat konfransına gəlməməklə yerli mediaya hörmətsizlik etdi. O, jurnalistlərə açıqlama vermək üçün komandanın kapitanını göndərsə də, mən başda olmaqla həmkarlarımız buna etiraz etdi. Aleksandar Kosoriçin fikirlərini lazımsız hesab edərək yola saldıq. Sayanın hörmətini saxlayaram, saymayan mənim qulumdu. Düşünürəm ki, Nermin Başiç Azərbaycanda azərbaycanlılara qarşı belə hörmətsizlik etməyin mümkünsüzlüyünü anladı.

Ötən həftə Avropa Liqasının 3-cü təsnifat mərhələsində “Qarabağ” Tofiq Bəhramov adına Respublika stadionunda Finlandiya HİK-ini qəbul etdi. Qarşılaşma 2:1 hesabı ilə komandamızın xeyrinə başa çatdı. Düzdü, həmin oyunda mən stadionda deyildim. Amma Helsinki təmsilçisinin baş məşqçisi Toni Korkeakunnas mətbuat konfransına gəlməyib, həmkarlarımın önünə çıxmayıb. Guya komanda təcili hava limanına yollanmalıymış.

Amma təcrübəli mütəxəssis elə Bakıda öz mətbuatlarına təqribən 1 səhifəlik müsahibə verib. Qəzetdə çalışanlar və çalışmış şəxslər çox gözəl bilir ki, bu qədər yazını təxminən 15-20 dəqiqəlik səs yazısından hazırlamaq olur. Deməli, finlandiyalı məşqçi öz jurnalistlərini sayıb, hörmət edib, onların suallarını cavablayıb, amma azərbaycanlıları vecinə almayıb. Korkeakunnasın Bakıdakı oyunun sonunda papağını çıxarıb yerə çırpması da hörmətsizlikdən başqa bir şey deyildi.

Yenə deyirəm, oyunda iştirak etməmişəm. Bu səbəbdən də nəyin baş verdiyini təfərrüatı ilə öyrənməyə çalışdım. Əslində HİK Bakıya daha tez gəlməliymiş. Lakin təyyarələrində çıxan problem səbəbindən uçuş bir qədər gecikib. Bu səbəbdən də finlandiyalıların oyunöncəsi mətbuat konfransı və məşqi keçirilmədi. Bəs vətənə dönərkən onları tələsdirən nə idi? Bir çarter reysinin pilotunun yanında 15 dəqiqəlik hörməti olmayan adamın komandasının yanında nə hörməti olacaq? Həmvətənlərinə müsahibə vermək üçün vaxt tapan məşqçi azərbaycanlı jurnalistlərin də qarşısına çıxa bilərdi.

Belə məqamlarda klubun mətbuat katibi UEFA nümayəndəsinə xəbər verir ki, rəqibin çalışdırıcısı konfransa gəlmək istəmir. Qurum buna görə klubu cəzalandırır. “Qarabağ”da da bu vəzifə boş olduğundan UEFA nümayəndəsinə xəbər verən olmayıb. Əslində bu prosesdə qurumun da günahı var. Avrokubokların pley-offuna kimi mətbuat konfransının çəkilişi olmur. Bu səbəbdən də hər dəfə təsnifat mərhələsinin oyunlarından sonra bazar açılır.
İndi iş düşür Azərbaycan mediasının üzərinə. Ya rus, ya da ingilis dilində UEFA-ya məktub yazıb, Finlandiya klubunun cəzalanmasını tələb etməliyik. Ya da gözləməliyik ki, Ağdam təmsilçisi Helsinkidə HİK-i darmadağın edərək rəqibi başa salsın. Əminəm ki, Azərbaycanı və azərbaycanlıları hamıdan çox sevən Qurban Qurbanov həmkarını bu tərbiyəsizliyə görə cəzalandıracaq. Ona göstərəcək ki, bizim ölkədə azərbaycanlılara hörmətsizlik etmək hər adamın başı üçün deyil...

İLKİN SULTANLI