Avqustun 16-da Yunanıstanın Pirey şəhərində UEFA Superkuboku uğrunda matç keçiriləcək.

“Football-plus.az” xəbər verir ki, son mövsümdə uyğun olaraq, Çempionlar Liqası və Avropa Liqasının qalibi olan “Mançester Siti” ilə “Sevilya”ya qarşılşacaqlar.

İngiltərə klubu oyunun aşkar favoriti sayılır. Ötən mövsüm “trebl”ə imza atan “şəhərlilər” dayanmaq fikrində deyil. “Mançester Siti”nin baş məşqçisi Xosep Qvardiola görüşlə bağlı UEFA-nın rəsmi saytına müsahibə verib. 52 yaşlı mütəxəssis komandası və “Sevilya”nın çalışdırıcısı Xose Luis Mendilibar haqda danışıb.

Çempionlar Liqasındakı qələbə
Həqiqətən də çox çətin turnirdi. “Mançester Siti” daha əvvəl heç vaxt sözügedən titula sahib çıxa bilməmişdi. Bu səbəbdən belə uğura nail olduğumuza görə çox sevincliyik. Bununla çox fəxr edirik. Premyer-liqada 5 uğurlu mövsümümüzdən sonra hər kəs Çempionlar Liqasında qələbə qazanmayacağımız təqdirdə uğurlarımızın tam olmayacağını deyirdi. İndi başqa dəlil tapmalı olacaqlar. Ən vacib odu ki, uzun müddət bu uğurun astanasındaydıq və gec-tez titula sahib çıxacağımızı bilirdik.

Finaldan əvvəl komanda ilə söhbəti
Ümumiyyətlə, futbolçulara heç nə demədim. Zaman bizi öyrətdi ki, komanda rahatlaşanda fikrini heç nə yayındırmır. Artıq 7 ildi birgəyik və bir-birimizi yaxşı tanıyırıq. Bu, sadəcə, mövsüm ərzində gördüyümüz ağır işin daha bir mərhələsi idi. Rəqibin nə qədər güclü olduğunu bilirdik, belə də oldu. Həmçinin üzləşəcəyimiz və tam qurtula bilmədiyimiz gərginlik haqda da bilirdik. Çempionlar Liqasında ilk dəfə qalib gələndə emosional cəhətdən həmişə çətindi. Bəlkə də yenidən finala vəsiqə qazansaq, hər şey bir qədər fərqli olacaq.

De Bruynenin zədəsi
Çox məyusedici idi, çünki eyni hadisə ikinci dəfə Çempionlar Liqasının finalında təkrarlandı. Kevinin meydanda çox fəal olduğunu görürdüm, onu topla təchiz edə bilirdik. Bu mənada bizim üçün çox vacib futbolçudu, zədəsi isə gözlənilməz oldu. Həmin anda yalnız hansı oyunçunun meydana çıxa biləcəyini və nə edəcəyini düşünürdüm. De Bruyne indiki heyətdən hələ əvvəlki baş məşqçi ilə işləyən yeganə futbolçudu. Onunla xüsusi münasibətlərimiz var, çox şeydən birlikdə keçmişik. Tez-tez mübahisə edir və tez-tez də qucaqlaşırdıq. Və nəhayət, bir-birimiə “bunu bacardıq” deyə biləcəyimiz an yetişdi.

Xose Luis Mendilibar
Onu hələ “Barselona”da olduğum vaxtlardan tanıyıram. “Sevilya”dakı vəziyyəti qəfil dəyişdi. Mendilibarın komandasının oyununa baxanda dərhal onun təsirini görürsən. Hücumlara sürətli çıxır, cinahlardan əla istifadə edir, cinahlardan çoxlu asmalar və yerlə ötürmələr edir, həmçinin, cərimə meydançasına topla yüksək səviyyədə daxil olurlar. “Sevilya”nın Avropa Liqasındakı uğurları qarşısında şlyapamı çıxarıram. Bu inanılmazdı! Onlar avrokuboklarda əla nəticələr qazanmağı bacarırlar. Superkubok uğrunda matç maraqlı alınacaq. “Sevilya”ya qarşı oynacağımıza və uzun fasilədən sonra yenidən Mendilibarla görüşəcəyimə görə şadam.

“Uembli”dəki ÇL finalı
Bu stadionla bağlı çox yaxşı xatirələrim var. Orda yarımfinal mərhələsində bir neçə məğlubiyyətim olsa da, amma finallar çox yaxşı alınıb. 1992-ci ildə baş tutmuş həlledici oyunu xatırlayıram. Həmin vaxt köhnə “Uembli”də futbolçu qismində “Barselona”ya tarixində ilk Çempionlar Kubokunu qazanmağa kömək etmişdim. Bu, əla idi. Sonra isə artıq “Barselona”nın baş məşqçisi kimi 2011-ci ildə “Uembli”də “Mançester Yunayted”də qalib gəlmişdim. Ancaq irəli uzun yol var. Görəcəyimiz işlər çoxdu. Yeni mövsüm hələ indi başlayır, lakin növbəti finalın da “Uembli”də baş tutacağı yaxşıdı. Gözəl şəhərdə yerləşən fantastik stadiondu. UEFA isə turniri inanılmaz səviyyədə təşkil edəcək, buna heç bir şübhəm yoxdu.

Mendilibar: “Qvardiolanın oyunla bağlı minlərlə variantı var”
“Sevilya”nın baş məşqçisi Xose Luis Mendilibar da UEFA Superkuboku ərəfəsində Avropa futbol qurumunun rəsmi saytına müsahibə verib. 62 yaşlı mütəxəssis bu ilin martında Andalusiya klubunun “sükanı arxasına” keçdi. O, qısa müddətdə nəinki komandanın La Liqada yerini qorumasını rəsmiləşdirdi, həmçinin “qırmızı-ağlar”ın tarixində 7-ci dəfə Avropa Liqasının (əvvəlki adı ilə UEFA kuboku - red.) qalibi olmasında vacib rol oynadı. Mendilibar açıqlamalarında “Mançester Siti”nin baş məşqçisi Xosep Qvardiolaya hörmətindən və müdafiəçi Xesus Navasa heyranlığından danışıb.

Avropa Liqasındakı qələbə
Oyunsonrası penalti seriyasında futbolçularımızın zərbələri necə yerinə yetirdiklərinə baxmırdım. Təkcə “Roma”nın oyunçularının cəhdlərini izləyirdim. Əvvəlcədən buna hazırlaşmamışdıq, çünki məşqdə və 60 min azarkeşin gözü qarşısında penalti vurmaq fərqli şeylərdi. Buna baxmayaraq, futbolçularımın zərbələri yaxşı alındı. Həmin finaldan əvvəl La Liqada qaldığımızı qeyd etmişdik. Avropa Liqasındakı qələbə ilə müqayisədə emosiyalar tam fərqli idi. Fikirləşirdim ki, oyunçularla birgə mən də tullanım? Bəs paltardəyişmə otağına gələndə nə edim? Gizlənim? Həqiqətən də özümü necə aparmalı olduğumu bilmirdim.

“Sevilya”ya təsiri
Bura gələndə özünü itirmiş və başını aşağı salmış futbolçuları gördüm. Onlardan sakitləşməyi və vəziyyəti qəlizləşdirməməyi xahiş etdik. Hər şeyi doğru başa düşdülər. Nəticələrimiz yaxşılaşdı, bu isə onları gördüyümüz işə inanmağı məcbur etdi. Oyunçuların diqqətini mənfi yox, müsbət amillərə çəkdim. Onlara bu günə qədər çalışdırdığım ən yaxşı kollektiv olduqlarını həmişə göstərməyə çalışdım.

Qvardiola ilə görüşü
Asan olmayacaq. Qvardiola baş məşqçi kimi nə qədər böyüdüyünü göstərdi. İldən-ilə öz səviyyəsini sübut etdi və “Mançester Siti” ilə Çempionlar Liqasının qalibi olmaqla hədəfinə çatdı. Bu komandanın qarşısını almaq çətindi, çünki Qvardiolanın oyunla bağlı minlərlə variantı var. Əla mütəxəssisdi. Onlar üçün də finaldı, matç çətin keçəcək.

Xesus Navas
Futbolda hər şeyə nail oldu. Məşqə gələn, sonra isə doğma kəndinə yollanan və dostları ilə istirahət edən futbolçudu. Sanki böyük uşaqdı, ancaq onunla işləmək ləzzət edir. Bəzən onun üzərində nəzarəti ələ almaq lazımdı. Bir qədər narahat insandı, ancaq 37 yaşı var, fiziki forması ilə 27 yaşlı oyunçunu xatırladır. Hərdən Navası qucaqlamaq və sakitləşdirmək tələb olunur. Hərçənd əksər futbolçular buna ehtiyac duyur.