Misli premyer-liqasında 1-ci tura "Sabah" - "Qəbələ" matçı ilə yekun vurulub - 5:0.

"Football-plus.az" xəbər verir ki, "qırmızı-qaralar"ın baş məşqçisi Elmar Baxşıyev oyundan sonra keçirilən mətbuat konfransında jurnalistlərin suallarını cavablandırıb:

"Oyun barəsində danışılası çox şey yoxdu. Komanda şəklində çox zəif oynadıq. Belə oyun gözləmirdik. İlk turdu. Oyunu düzgün analiz edib qarşıdakı matçlara hazırlaşmaq önəmlidi".

- "Qəbələ" avrokuboklarda "Omoniya" ilə səfər matçından gəlib. Cəhd etdiz ki, oyunun vaxtı ən azı iki gün sonraya keçirilsin? 
- Nikosiyadan gələndən sonra heç mən özüm bərpa olunmamışam, qaldı ki, futbolçular. Əlbəttə ki, ağırdı. Səfərdə oynayırsan, səhərə kimi yatmayıb reys gözləyirsən. Futbolçulara da adaptasiya baxımından təsir edir. Oynadığımız ən zəif oyun idi. Toplanış vaxtı komandamda dinamika görürdüm. Sadəcə çox yorğun idik. Futbolçularım daha yaxşı çıxış edəcək.

- Psixoloji cəhətdən toparlana biləcəksiz?
- Belə məğlubiyyətlər bəzən qaçınılmazdı. Hər bir komandanın başına gələ bilər. Ümidsiz deyilik. Çalışacağıq ki, futbolçuları qarşıdakı oyunlara hazırlayaq.

KƏNAN BAHADIR