PSJ Kilian Mbappesiz yollandığı mövsümöncəsi turnedən artıq Fransaya qayıdıb. Parislilər Yaponiya ilə Koreyanı əhatə edən Asiya turnesinin gedişində yaxşıca pul da qazanıblar. “L’Équipe”ə inansaq, klub bu səfərdən 20 milyon avro qazanıb. “Le Parisien” nəşri isə başqa məbləğin – 25 milyon avronun üzərində dayanır.

Bu səfər maliyyə tərəfi ilə yanaşı, reklam baxımından da vacib idi. PSJ brendi artıq Asiyada məşhurdu, bu il isə paytaxt klubu həmin regionda mövqeyini bir qədər də möhkəmləndirib. İndi parislilərin heyətində klub tarixinin ilk asiyalısı Li Kan İn də var. Texniki nəticələrə gəlincə, PSJ Asiya turnesi zamanı yalnız bir rəqibi məğlub edə bilib. Neymarın dublu və Asensionun qolu Luis Enrikenin komandasına Koreyanın “Çonbuk Henday Motors” klubu üzərində qələbə qazandırıb. Qalan oyunlarda isə uğur parislilərin tərəfində olmayıb. Onlar Milan “İnter”inə və Yaponiya “Sereso Osaka”sına uduzub, “Əl-Nəssr” ilə heç-heçə oynayıb.

Əlbəttə, qeyri-sabit çıxışı təbii qarşılamaq lazımdı. Axı komanda yeni baş məşqçinin rəhbərliyi altında hazırda yenidənqurma mərhələsini yaşayır.
PSJ ilə bağlı maraqlı xəbərlər çoxdu. Jurnalist Dani Gil PSJ-nin Fransa paytaxtındakı rəsmi fan-şopuna baş çəkərkən maraqlı mənzərə ilə üzləşib. Belə ki, klub hələ də Messinin futbolkalarını satır.

"Football-plus.az" xatırladır ki, Lionel artıq bir neçə aydı parislilərdən ayrılıb və indi “İnter Mayami”nin heyətində Amerikanı fəth edur. Argentinalının ayrı-ayrı fanatları bir qədər də irəli gedərək aydınlaşdırıblar ki, istənilən arzulayan şəxs Messinin futbolkasını PSJ-nin rəsmi saytı vasitəsi ilə də ala bilər. Belə durum fanatları özündən çıxarıb.

Onlar emosiyalarını sosial şəbəkələrdə bölüşürlər:

* Klub hələ də Messidən pul qazanır. Belə görünür ki, Qətər fondu kifayət etmir.
* Messi belə biabırçı klubu mümkün qədər tez məhkəməyə verməlidi.
* Messini PSJ-də heç vaxt dəyərləndirməyiblər, ancaq bu klub onun adı hesabına hələ də pul qazanır. Necə də ikiüzlülükdü.
* Onlar həmişə yalnız pulu düşünürlər. Messi artıq PSJ-də yoxdu, ancaq klub Leonun sayəsində pul qazanmaqdadı. Biabırçılıqdı!
* Heç kim bu futbolkaları almamalıdı! Onlara Messinin hesabına pul qazanmaqda yardım etməyək, daha kifayətdi.

Həqiqətən də argentinalının futbolkası hələ də PSJ-nin saytında satılır. Leo ilə yanaşı, klubdan ayrılan daha bir məşhur futbolçunun – Serxio Ramosun da formasını almaq mümkündü. Bununla belə, parislilərin heyətində olan və sabiq futbolçuları ilə bağlı atributların assortimenti ciddi şəkildə fərqlənir. Məsələn, saytda üzərində Ramosun və ya Messinin soyadı olan yeni klub formalarını sifariş vermək mümkün deyil.

Daha bir maraqlı detal var. Həmkarlarımız PSJ-nin rəsmi dükanından Mbappenin soyadı olan futbolkaların yoxa çıxdığını da aydınlaşdırıblar, hərçənd saytda hələ də belə formalar qalır. Çox güman, parislilər, sadəcə, sabiq oyunçularının anbarlarda qalan formalarını satıb qurtarmaq istəyirlər. Messi ilə Ramos ayrılsa da, hələ də onların formasına müştəri tapmaq mümkündü. Ancaq Kilianın maykalarının piştaxtadan yoxa çıxması, çox güman, fransalı ulduza təsir göstərmək cəhdindən irəli gəlir. Hərçənd bu addım klubun fanatları Mbappenin başqa komandaya keçidinə hazırlaşdırmaq niyyətinə də xidmət edə bilər. “El Golazo de Gol” xəbər verir ki, Fransa yığmasının forvardının portreti “Park de Prens” stadionundan da yığışdırılıb. Xatırladaq ki, Mbappe ətrafında maraqlı durum yaranıb: PSJ müqavilə müddətini uzatmayacağı təqdirdə onu satmaqda israrlıdı. Paytaxt klubu qərarını dəyişməyəcəyi təqdirdə futbolçunu növbəti mövsüm boyunca ehtiyat oyunçular skamyasında saxlamağa da hazırdı.