“Həm fiziki, həm də psixoloji cəhətdən özümüzü yaxşı hiss edirik. Hazırlıq davam edir. Məğlubiyyətin yaratdığı emosional gərginliyi geridə qoyub önümüzə baxırıq. “Araz-Naxçıvan”la matça köklənmişik. İnanırıq ki, qələbə qazanıb azarkeşlərimizi sevindirəcəyik.

Əvvəlki oyunlar haqda çox danışmaq istəmirəm. “Omoniya”nın güclü rəqib olduğu heç kimə sirr deyil. Yeni qurulan komanda ilə Kiprdəki oyunda qalib gəlmək müşkül məsələ idi. Evdəki qarşılaşmamız daha uğurlu alınmışdı. Burda, təbii ki, tərəfdar dəstəyinin önəmini vurğulamalıyam. “Sabah”la matçda isə çox yorğun idik. Səfərdən Bakıya qayıdıb yatmışdıq. Demək olar ki, oyanan kimi matça çıxdıq. Oyunu izləyənlər bilir ki, fiziki cəhətdən yetərincə hazır deyildik. Buna baxmayaraq, əlimizdən gələni etdik. Sevindirici haldı ki, sona qədər qol vurmağa çalışdıq. Əzmkarlıq, inam varsa, hər halda, yaxşı olacaq. Təxminən 2-3 tur sonra əvvəlki “Qəbələ”dən daha güclü komanda görəcəyinizə əminəm. Çox çalışırıq ki, ümidləri doğruldaq. Həm ölkə kubokunda, həm də premyer-liqada iddialıyıq”.

“Məğlubiyyətə görə məhz qolkiperin tənqid edilməsini doğru saymıram. Düzdü, səhvləri oldu. Amma peşəkar futbolda matçın nəticəsinin günahkarı bir nəfər olmur. Elə oyunlar olub ki, o bizim səhvimizi düzəldib. Həmin gün biz də oyunumuzla qapıçının səhvlərinin qarşısını ala bilərdik. Təəssüf ki, olmadı”.