PSJ-nin Kilian Mbappeyə münasibətdə prinsipial mövqeyi dəyişməyib. Rəhbərlik özünü aldadılmış sayır və hesab edir ki, müqavilə müddətini uzatmaqla bağlı opsiyanı aktivləşdirməkdən boyun qaçıran forvard artıq “Real”la gələn yay bu kluba azad agent kimi keçməklə bağlı bütün şərtləri şifahi şəkildə razılaşdırıb.

"Football-plus.azın məlumatına görə, incikliyin səbəbi isə Kilianın Parisi pulsuz tərk etməməklə bağlı vədlərində gizlənir.

Ulduz özü ətrafındakıların mediaya sızdırmaları ilə belə anlaşmanın olduğunu inkar edir. Ancaq internet heç nəyi unutmayıb və PSJ-dəkilər ərinmədən hesablama aparıb: Mbappe ictimaiyyət önündə 8 dəfə belə deyib. Bir sözlə, bütün gedişlər yazılıb və klub haqlı olduğuna əmindi. Elə inadkar ulduzu Yaponiya turnesinə yollanan heyətdən çıxarmaq qərarında da. Bu artıq futbolçunun ultimatumu yerinə yetirməməsinə Paris klubunun reaksiyası idi. Ardından PSJ yeni müddət elan etdi: Mbappe iyulun 31-nə qədər ya müqavilə müddətini uzatmaqla bağlı qərar verməli, ya da getməliydi. Əks halda bütün mövsümü ehtiyat oyunçular skamyasında keçirməli olacaqdı. “Marca” bir neçə gün əvvəl forvardın artıq Luis Enrikenin yeni mövsüm üçün planlarında yer almadığını xəbər verdi. “Foot Mercato” isə dəqiqləşdirdi ki, ulduzun ehtiyatda qalmasıyla bağlı prinsipial qərar artıq qəbul olunub. Etiraf etmək lazımdı ki, klubun və futbolçunun təmsilçiləri bu müddətdə yalnız ultimatum dilindən yararlanmayıb. PSJ əlavə müqavilə imzalamaq (Mbappe müqavilə müddətini 2025-ə qədər uzadacaq, ancaq bir il sonra gedişi ilə bağlı təminat alacaqdı) yolu ilə ortaq məxrəcə gəlməyə çalışıb. Təbii ki, Kilianın cavabı mənfi olub, üstəlik o, klub ofisindən aldığı növbəti görüşlə bağlı təklifə, ümumiyyətlə, reaksiya verməyib.

“Real” belə durumda marığa yatıb ki, bu da gözlənilirdi. Ona görə ki, Madrid klubu ötən yay havayı əldə elə biləcəyi futbolçu üçün nəhəng məbləğdə pul ödəmək istəyi ilə alışıb-yanmır. Amma “Real”a yaxın media xəbər verir ki, futbolçu azad agent statusu alacağı haıda, madridlilər ona artıq 130 milyon avro imzahaqqı vəd edib. Mbappe ailəsi, təbii ki, bu pulu əldən vermək istəmir. PSJ-nin loyallığa görə iyulun 31-i və avqustun 31-i iki partiyada ödəməli olduğu 80 milyonu da nəzərə alsaq, futbolçunun hazırkı müqaviləsinin sonuna qədər Parisdə qalmaq istəyinin səbəbi asanlıqla anlaşılır.

Bəs hadisələrin bundan sonrakı axarı necə olacaq? Düzdü, PSJ cərimələnən və heyətdən uzaqlaşdırılan Lionel Messinin nümunəsində artıq istəyərsə, öküzlə Yuperi eyniləşdirməyi bacardığını göstərib, ancaq istənilən halda bu da klubun imicinə zərbədi. Mbappeyə gəlincə, klub mənəvi cəhətdən haqlı olsa belə, müqavilə və fundamental çalışmaq hüququ pozulacaq. Fransa Futbolçularının Həmkarlar İttifaqı artıq bu məqamı xatırladıb. Belə kəskin addımlar PSJ-nin hələ də satışına görə pul qazanmaq niyyətində olduğu futbolçunun qiymətinə də təsir edəcək. Təsadüfi deyil ki, İspaniya və Fransa insayderləri prinsipial şəkildə heç bir addım atmayan və şərhlərdən qaçan “Real”ın hazırda PSJ-yə psixoloji təzyiq göstərməsi yönündə ortaq fikirlər səsləndirir. “Le Parisien”in versiyasına görə, İspaniya tərəfi sona qədər məsələni dartacaq və Mbappeni ucuz qiymətə almağa çalışacaq. “RMC Sport” isə əmin edir ki, iyulun 31-dən sonra PSJ-də klub üçün alçaldıcı məbləğdə təklif gözləyirlər. Təbii ki, belə təklif rədd olunacaq, ardından “Real”ın iddia etməyə haqqı çatacaq ki, futbolçunu almağa çalışdı, amma PSJ-dən “yox” cavabı eşitdi.

Mbappenin karyerasını davam etdirməsi ilə bağlı alternativ variantlar varmı? Belə görünür ki, yox. Səudiyyə Ərəbistanının “Əl-Hilal” klubunun “Real”a keçid ərəfəsində təklif etdiyi kosmik 700 milyon təklifini də futbolçu yaxın buraxmadı, hərçənd ailəsi bu məbləğdən ötrü sinov gedird. İngiltərə premyer-liqasının klubları ilə də hansısa ağlabatan danışıqlar getmir. Yürgen Kloppun dediyinə görə, “Liverpul”da hətta yeni şayiələrə gülüblər, maliyyə səbəbləri üzündən belə sövdələşmə mümkün deyil. Hərçənd bəzi mənbələrə inansaq, “Çelsi”nin sahibi Todd Bouli bu həftə Nasser Əl-Xelayfiyə zəng edərək Mbappe ilə danışıqlara başlamaq üçün icazə istəyib.

“Barselona” ilə bağlı ssenari isə əvvəlcədən fantastik görünür. Axı kataloniyalılar indi maliyyə durumu baxımından heç də ən yaxşı günlərini yaşamır. Nəticədə Qavi, Rafinya və Dembelenin də içində yer aldığı dəyiş-düyüş sxemini həm PSJ, həm də Mbappe rədd etdi.

Hər halda, Mbappe ilə bağlı transfer dastanının sonuna gəlib çatmışıq. Demək olar ki, bütün qaynaqların fikri eynidi: PSJ futbolçunu satmaq istəyirsə, o özü “Real”a keçməyi arzulayırsa, Madrid klubunun Kiliana ehtiyacı varsa, tərəflər mütləq razılaşacaq. Bəlkə də elə bu həftə. Parislilərin əhval-ruhiyyəsi belədi ki, avqustun 11-də start götürəcək yeni mövsümə qədər məsələni qapasınlar. Ancaq çətin ki, söhbət 230 milyon avrodan gedir. PSJ-nin 180-200 milyon arası təklifləri qəbul edəcəyini bildirən qaynaqlar indiki məqamda həqiqətə daha yaxın görünür. Bütün bunlar artıq texniki detallardı. Əsas məqam odu ki, 2023-ün yayının ən nəhəng transfer dastanı məntiqi sonluğa yaxınlaşmaqdadı. Mbappenin bir il ərzində ehtiyat oyunçular skamyasını “isidəcəyinə” inanmaq çox çətindi. Onun “Santyaqo Bernabeu”nun qazonuna ağ formada çıxmasını təsəvvür etmək isə asandı. Ancaq serialın bir qədər uzanması da mümkündü. “The Telegraph”dakı yazıya inansaq, Mbappenin “Əl-Hilal” təmsilçiləri ilə görüşə razılıq verməməsi PSJ-nin xoşuna gəlməyib. Paris klubu bu hərəkəti “Real”la sövdələşmənin təsdiqi kimi qiymətləndirir. Odu ki, klubda hətta FİFA-ya şikayət etməyin mümkünlüyünü də araşdırırlar. Hərçənd Madrid klubunun Mbappe ilə təmasını sübut etmək qeyri-realdı.

Yeri gəlmişkən...
Mbappenin şəkli PSJ-nin rəsmi saytından yığışdırılıb. Söhbət “oyunçular” bölməsində yer alan fotodan getmir. Sadəcə, saytın üz qabığında kollektiv foto var idi. İndi bura baş çəkənlər komandanın bəzi oyunçularının, daha dəqiqi, Neymar, Verratti, Markinyos, Ernandes və Li Kan İnin yer aldığı posteri görür, halbuki əvvəllər Kilian da var idi.

Reaksiya
Karlo Ançelotti, “Real”ın baş məşqçisi (PSJ-nin Mbappenin “Real”la gizli anlaşa biləcəyi ilə bağlı FİFA-ya şikayət etmək ehtimalı haqda sualın cavabında):