Konfrans Liqasının 2-ci təsnifat mərhələsinə yekun vurulub.

"Football-plus.az" xəbər verir ki, "Sabah" - RFŞ (2:1) matçından sonra "bayquşlar"ın çalışdırıcısı Murad Musayevin mətbuat konfransı keçirilib. Sizi mütəxəssisin fikirləri ilə tanış edirik:

- Rəqib azlıqda qaldıqdan sonra qol vurdu. Bu, sizin üçün sürpriz olmadı?
- Rəqib çox yaxşı komandadı. Baş məşqçiləri çox yaxşıdı. Riskə getdilər. İkinci hissədə biz topa daha yaxşı nəzarət edirdik. Birinci qolu biz vursaydıq, rəqib daha da açılacaqdı. Qol fürsətlərimiz çox oldu. Qol buraxmağımıza baxmayaraq, özümüzdə güc taparaq iki qol vurduq.

- Rəqib həmkarınız bildirdi ki, "Sabah" meydana hesabı qorumaq üçün çıxmışdı. Siz necə düşünürsüz?
- Hesabı qorumağa çalışmaq bizim səhvimiz olardı. Çalışırıq ki, həmişə hücum futbolu sərgiləyək. Bu gün də futbolçulara təlimat vermişdik ki, hücum edək.

- Sanki qırmızı vərəqə rəqibə yox, "Sabah"a problem oldu. Komanda arxayınlaşmışdı. Siz necə düşünürsünüz?
- Sizinlə razı deyiləm. Oyun bizik nəzarətimiz altında idi. Rəqibin çox qol fürsətlərini xatırlamıram.

- Həlledici məqamlarda futbolçular bir-birinə ötürmə vermir. Həmin oyunçularla söhbətiniz olacaq?
- Əlbəttə ki, təhlil edəcəyik, hər biri ilə danışacağıq. Daha çox ümumi şəkildə söhbət edəcəyik. Çünki, futbol komanda oyunudu.

- Bu gün Vensan Til start heyətdə meydana çıxmışdı. Sanki komandaya uyğunlaşmayıb...
- Vensan təlim-məşq toplanışı zamanı bizə qoşulmuşdu. Onun oyun tərzi bizə çox uyğun gəlir, hücum futbolunda yaxşı iştirak edir. Bu gün cinah hücumçusu kimi çıxış etdi. O daha çox "10 nömrə" kimi oynayır. Yaxşı fürsətləri olduz amma istifadə edə bilmədi. Marqarita da yüz faiz uyğunlaşmayıb.

- Bir həftə sonra "Partizan"la oynayacaqsız. Onlara qarşı hansı gözlənilməz gedişləriniz olacaq?
- Nəsə demək çətindi. Çünki, hələ onların heç bir oyununu izləməmişəm. Bütün fikrim RFŞ-ə yönəlmişdi. Əlbəttə ki, "Partizan" ölkəsinin ən köklü komandalarından biridi. Bu gecə ola bilər ki, onların oyunlarına baxaq.

- Bu gün Apehlə Mikels gözəl tandem təşkil edirdilər. Apeh tam hazırdı?
- Yüz faiz hazırdı. Amma belə rəqabətin olması da bizim üçün yaxşıdı. Davit Volkovla rəqabət aparır. Yaxşıdı ki, heyətdə bir-biri ilə rəqabət aparacaq hücumçular var.

- Sizcə, Marqarita Apehlə Mikels arasında rəqabət apara biləcək?
- Əlbəttə ki, Apehlə rəqabət apara bilməz. Çünki, Apeh hücumçudu. Amma Mikelslə rəqabət apara bilər. Hər iki cinahda oynamağı bacarır. Ötən mövsüm Aleksey Kaşuk çox yaxşı çıxış etdi. Mənə görə Kaşuk Azərbaycanda ən yaxşı cinah oyunçularından biri idi. İnanırıq ki, Marqarita da inkişaf edəcək.

- Yeni transferlər gözlənilir?
- Bəli. Bir mövqeyə transfer etmək istəyirik. Alınsa, edəcəyik.

- Gənc heyətlə böyük uğurlar qazandınız. Artıq sizdən böyük hədəflər gözlənilir. Bu, sizdə təzyiq yaratmır?
- 24 saat gərginlikdəyəm. Mənim sənətim belədi. Öncə daha çox işləməliyik. Bundan sonra istədiyimiz yerə gedə biləcəyik. Məndə təzyiq yaratmır.