“Omoniya” cavab görüşünün biletlərini üç gün pulsuz payladı
“Qəbələ” yeni mövsümə və Konfrans Liqasının 2-ci təsnifat mərhələsində “Omoniya” ilə cavab matçına hazırlaşır. Ev oyununda 2:3 hesabıyla uduzan “qırmızı-qaralar” avrokubok macərasında təhlükə ilə üzləşib.
"Football-plus.az" xəbər verir ki, onları gərgin səfər qarşılaşması gözləyir. Xatırladaq ki, sözügedən oyun avqustun 3-də Nikosiyada keçiriləcək. Rəqibin baş məşqçisi Sofronis Avqusti hələ Qəbələdə olarkən dərhal evə qayıdıb növbəti matça çox ciddi hazırlaşacaqlarını demişdi. Həqiqətən elə oldu. “Omoniya”nın rəsmi sosial şəbəkə hesabında komandanın məşqindən videolar paylaşılır. Üstəlik ön satış üçün nəzərdə tutulan biletlər bütün azarkeşlərə pulsuz təklif edilib. Daha dəqiq desək, iyulun 28-31-i aralığında bilet alanlar ödəniş etməyəcək. Oyunu stadiondan izləmək istəyənlər bu gündən pul ödəməli olacaq. Qeyd edək ki, ən baha bilet 20 avroyadı.
Görəsən, “Qəbələ”də durum necədi? Hazırlıq prosesi necə irəliləyir? Komandanın səfər planı bəllidi? Bu suallarla klubun idman direktoru Nail Kərimova müraciət etdik:
“Bəli, səfərlə bağlı proqram hazırdı. Matçdan bir gün öncə Bakı – Larnaka çarter reysi ilə yola düşəcəyik. Komanda Nikosiyadakı “Hilton” otelində məskunlaşacaq. Heyətdə komanda üzvləri və klubun baş ofisindən bir neçə əməkdaş yer alacaq. Təyyarə kiçik olduğundan azarkeş, sponsor rəsmiləri və başqa şəxslər bizimlə olmayacaq. Təşkilatçılıqla bağlı problemlər aradan qaldırılıb. Bilirsiz ki, iki ölkə arasında münasibətlər olmadığından Kiprə viza almaq çətindi. Sağ olsun, “Omoniya” rəsmiləri, vizanı sərhəddə almağımıza şərait yaradacaqlar. Komandanın durumuna gəlincə, hər şey yaxşıdı. Məşqlər davam edir. Futbolçular məsuliyyətlə matça hazırlaşırlar. Ümumi durum haqda onu deyə bilərəm ki, hazırda büdcə üzrə nəzərdə tutulan vəsaiti xərcləmişik. Fikrimiz var idi ki, hücum xətti üçün yeni futbolçu transfer edək. Təəssüf ki, alınmır. Əlavə gəlir mənbəyi olsa, bu yöndə addım atacağıq”.
“Qəbələ” rəsmisi klubun yeni mövsüm üçün hədəfini də açıqladı: “Növbəti ”futbol ili” ilə bağlı məqsədlər dəyişməyib. Döyüşkən, mübariz kollektiv formalaşdırmaq istəyirik. Yekunda avrokubok oyunlarına vəsiqə verəcək yerlərdən birində qərarlaşmaq niyyətindəyik”.
KƏNAN BAHADIR
Digər xəbərlər
