O yeni komandasının heytində rəsmi oyuna çıxmasa da, artıq adını klubun tarixinə yazdırmağı bacarıb. Söhbət karyerası ərzində Niderlandda “Zvolle”, “Maastrixt”, Bolqarıstanda Sofiya ÇSKA-sı, Portuqaliyada “Santa Klara”, “Akademiko Viseu” və “Oliveyrense” klublarının şərəfini qoruyan, bir neçə gün öncə “Sumqayıt”la müqavilə bağlayan Steven Pereyradan gedir. O, Kabo-Verde millisinin heyətində 10 oyunda da iştirak edib. Müdafiəçi “Sumqayıt”ın ilk legioneri kimi yadda qalacaq. Son klubu Cənubi Afrika təmsilçisi “Martizburq” olan 28 yaşlı futbolçu ilə “kimyaçılar”ın bugünkü məşqindən sonra danışdıq.


- “Sumqayıt”ın tarixinə düşdüyündən xəbərin var?
- Klubun tarixinə düşdüyüm üçün qürur duyuram. “İnstaqram” səhifəmə də çox yazırlar. Klubun azarkeşləri mənə böyük sevgi göstərirlər. Bunun qarşılığı olaraq əlimdən gələni edəcəm ki, azarkeşlərin sevgisini itirməyim.

- Bir neçə gündü burdasan. Həm komanda, həm də şəhərlə bağlı təəssüratını bilmək istərdik.
- Bir həftəyə yaxındı ki, burdayam. Komanda yoldaşlarım sağ olsunlar, mənə lazımi diqqəti göstərirlər. Hamısı nə lazım olsa, kömək etməyə hazır olduqlarını bildiriblər. Dəstəklərini hiss edirəm. Burda məni hər şey qane edir. İndi ancaq yeni mövsümə 100 faiz hazır olmaq barədə düşünürəm.

- Karyeran ərzində həm Afrika, həm də Avropa klublarında çıxış etmisən. Azərbaycanla əvvəl çıxış etdiyin ölkələri müqayisə edə bilərsən?
- Bütün ölkələr fərqlidi. Özünəxas mədəniyyti və mentallığı var. Ancaq futbol hər yerdə eynidi. Hər yerdə meydana qələbə üçün çıxırlar. Azərbaycanda olduğum qısa müddətdi. Bu üzdən müqayisə aparmaqda çətinlik çəkirəm.

- Millidə komanda yoldaşın olan Patrik Andrade “Qarabağ”da çıxış edirdi. “Sumqayıt”a transfer olmamışdan öncə onunla məsləhətləşdin?
- Əlbəttə, onunla danışmışam. Ölkə, burdakı vəziyyət barədə məlumat almışam. O da buranı mənə təriflədi. Bildirdi ki, ora gedə bilərsən.

RƏŞAD