Konfrans Liqasının 2-ci təsnifat mərhələsində bu gün keçiriləcək “Qəbələ” - "Omoniya" (Cənubi Kipr) və “Neftçi” – “Jelezniçar” (Bosniya və Hersoqovina) matçlarının hakim təyinatlarını təqdim etmişdik.

Belə ki, “Qəbələ”nin ev matçını Rumıniya Futbol Federasiyasından Andrey Çivulete idarə edəcək. Ona Sebastyan George və Daniel Mitruti yardım göstərəcək. Dördüncü hakim funksiyasını Horatiu Fesnik yerinə yetirəcək. “Neftçi”nin səfər oyunu isə Estoniyadan olan hakimlər briqadasına tapşırılıb. Baş hakim Yuri Frişer olacaq. Referi yan xətt hakimi Neeme Neemlayd və Sander Saqanın yardımından faydalanacaq. Dördüncü hakim funksiyasını Kevin Kaivoja icra edəcək. Maraq üçün qeyd edək ki, Frişerin köməkçisi estoniyalı laysman Veyko Mıtsnik idi. Lakin qeyri-müəyyən səbəblərə görə, o Neemlaydla əvəzləndi.

Sözügedən matçlar hər iki təmsilçimiz üçün vacibdi. Həm “Qəbələ”, həm də “Neftçi” avrokuboklara vəsiqə qazanmaq üçün mövsümboyu tər töküb. Qarşılaşmaları idarə edəcək hakimləri yaxından tanımaq da vacibdi. Bunu nəzərə alaraq UEFA-nın ədaləti təmsilçisi kimi güvəndiyi mütəxəssisləri araşdırdıq.

Andrey Çivulete… 36 yaşlı referinin qalmaqallarla yadda qaldığını iddia edə bilmərik. İdarə etdiyi matçlarin əksəriyyətində narazılıq qeydə alınmayıb. Onu əsasən Rumıniyanın superliqa matçlarında görürük. Karyerası ərzində 114 çempionat oyununda ədaləti təmin edib. Bundan başqa, Çempionlar Liqasında (2) və Konfrans Liqasında (2) da UEFA-nın güvəndiyi referilər sırasında yer alıb. Çivulete həm də beynəlxalq yoldaşlıq görüşlərini idarə edib. Bu baxımdan qeyd etmək yerinə düşər ki, avrokubok matçlarının 2-ci təsnifat mərhələsi üçün sözügedən hakimə güvənmək olar. Ümumiyyətlə, Andrey indiyə qədər 239 oyunda hakimlik edib. O, 1094 sarı, 62 qırmızı vərəqə üçün əlini cibinə aparıb.

Yuri Frişer… 39 yaşlı referi yetərincə zəngin təcrübəyə malikdi. “Qəbələ” – “Omoniya” matçı üçün Çivuleteden daha uyğun biri təyin edilə bilərdisə, “Jelezniçar” – “Neftçi” matçı üçün Frişer idealdı. Estoniya premyer-liqasında 200 matç idarə edən ədalət təmsilçisi uğurlu idarəçiliklə yadda qalıb. Daha əvvəl Çempionlar (3), Konfrans (1) və Avropa Liqalarının (5) matçları ona həvalə edilib. Frişerə həm də 5 beynəlxalq yoldaşlıq görüşündə güvənilib. “Qarapaltarlı” futbol ictimaiyyətinə sərt cəzadan daha çox xəbərdarlıqları ilə tanışdı. Karyerası ərzində 344 matç idarə edən hakim 1232 sarı, 60 qırmızı vərəqə göstərib.

KƏNAN BAHADIR