Bu gün Konfrans Liqasında 2-ci təsnifat mərhələsinin ilk oyunlarına yekun vurulub.

"Football-plus.az" xəbər verir ki, ölkəmizin iki təmsilçisi də meydana çıxıb. “Qəbələ” “Omoniya”nı qonaq edib - 2:3 “Neftçi” isə səfərdə “Jelezniçar”la qarşılaşıb - 2:2. “CBC Sport” hər iki oyunu canlı yayınlanıb.

Konfrans Liqası
2-ci təsnifat mərhələsi, ilk oyun
Qəbələ (Azərbaycan) – Omoniya (Cənubi Kipr) 2:3
Əyyub Allaş, 4, 62 - Roman Bezus, 45+1, 50, 82 (p.)
"Qəbələ": 13. Kristof Atanqana, 2. İlkin Qırtımov, 28. Murad Musayev, 4. Lukas Afriko, 34. Urfan Abbasov, 7. Emil Səfərov, 99. Ahmed Ayzaya, 9. Əyyub Əllaş, 10. Omar Hani, 14. Ülvi İsgəndərov, 72. Osama Xalayla.
Baş məşqçi: Elmar Baxşıyev.
"Omoniya": 40. Fabiano, 3. Adam Mettyuz, 5. Senu Kulibali, 22. Adam Lanq, 6. Markinyos Sipriano, 31. Yoannis Kusulos, 8. Moretu Kassama, 10. Loizos Loizu, 90. Roman Bezus, 7. Villi Semedu, 18. Kərim Ansarifard.
Baş məşqçi: Sofronis Avqusti.
Hakimlər: ANDREY ÇİVULETE, Sebastyan George, Daniel Mitruti, Horatiu Feşniç (hamısı Rumıniya).
Hakim-inspektor: Devid Malkolm (Şimali İrlandiya).
UEFA nümayəndəsi: Natalya Vorobyova (Belarus).
27 iyul. Qəbələ. Şəhər stadionu. Saat 20.00.

Mütəxəssislərin fikrincə, bu cütün favoriti Cənubi Kipr təmsilçisidi. Çünki “Qəbələ”nin ölkə kubokunu qazanan heyəti ciddi dəyişikliyə məruz qalıb. Elmar Baxşıyev Konfrans Liqası və premyer-liqanın yeni mövsümü üçün demək olar ki, yenidən kollektiv formalaşdırdı. Düzdü, gedənlər əvəz olundu. Lakin transferlərin nə qədər keyfiyyətli olduğu hələ ki bəlli deyil. Əslində Nikosiya təmsilçisi də əvvəlki əzəmətindən uzaqdı. Bu komandanı də çoxlu futbolçu tərk edib. Sadəcə, “Omoniya”nın avrokubok təcrübəsi daha zəngindi. Bu komanda müntəzəm avrokubokların qrupunda yer alır. Bir sözlə, “qırmızı-qaralar”ı ağır sınaq gözləyir. Ümid edək ki, “Qəbələ” doğma meydandan əlverişli nəticə ilə ayrılaraq növbəti tur şansını özündə saxlayacaq və ya təmin edəcək.

“Qəbələ”nin heyətində böyük itki hesab edəcəyimiz bir futbolçu var. Söhbət Ferras Abu Akaldan gedir. Əməliyyat olunan israilli yarımmüdafiəçi bugünkü görüşdə meydanda ola bilməyəcək. “Omoniya”da isə üç zədəli var. Müdafiəçilər Nikolas Panayiotu, Paris Psaltis və monteneqrolu yarımmüdafiəçi Novitsa Yerakoviç Qəbələdəki görüşdə iştirak etməyəcək.

Bu komandalar tarixdə ilk dəfə üz-üzə gəlir. Lakin “Qəbələ” daha öncə Cənubi Kipr təmsilçisi ilə qarşılaşıb. “Qırmızı-qaralar” 2015/16 mövsümündə Avropa Liqasının qrup mərhələsində “Apollon”la qarşılaşıb. Larnakadakı görüşdə qalib müəyyənləşməyib – 1:1. Bakıdakı matçda isə bizimkilər qələbə qazanıb – 1:0.

Jelezniçar (Bosniya və Hersoqovina) – Neftçi (Azərbaycan) 2:2
Cenan Haraçiç, 14, Cozef Amoa, 45+9 - Kilan Lebon, 44, Rəhman Hacıyev, 90+4
"Jelezniçar": 1. Edis Mulaliç, 5. Aleksandar Kosoriç, 19. Amar Drina, 33. İrfan Yaşareviç, 8. Nedim Mekiç, 18. Edin Biber, 7. Süleyman Krpiç, 17. Andriya Drlyo, 26. Cozef Amoa, 9. Cenan Haraçiç
Baş məşqçi: Nermin Başiç
"Neftçi": 1. İvan Brkiç, 4. Mark Tamaş, 5. Kenni Sayef, 7. Azər Əliyev, 8. Emin Mahmudov, 10. Filip Ozobiç, 11. Kilan Lebon, 14. Eddi İsrafilov, 23. Ataa Cabir, 26. Ömər Buludov, 44. Yuri Matias
Baş məşqçi: Adrian Mutu
Hakimlər: YURİ FRİŞER, Neeme Neemlayd, Sander Saqa, Kevin Kaivoja (hamısı Estoniya).
Hakim-inspektor: Alein Bieyri (İsveçrə).
UEFA nümayəndəsi: Luis Kuervaş Del Real (İspaniya).
27 iyul. Sarayevo. “Qrbaviça stadionu”. Saat 23.00.

“Neftçi”də həm baş məşqçi, həm rəhbərlik, həm də komandanın üzvləri yenilənsə də, problemlər qalmaqdadı. Əsas problem hücumçu ilə bağlıdı. Mateus Saldanya komandadan qovuldu. Bu səbəbdən də flaqman Sarayevoya hücumçusuz yollandı. Flaqmanda yeganə problem braziliyalı ilə bağlı deyil. Yeni transfer Qara Qarayev səfərə yollansa da, meydana çıxa bilməyəcək. Çünki “Qarabağ” oyunçunu Çempionlar Liqasındakı oyunlar üçün sifariş ərizəsinə daxil etdiyinə görə “ağ-qaralar” yarımmüdafiəçidən qrup mərhələsinə kimi istifadə edə bilməyəcək. Bütün bunlara baxmayaraq, səfərdəki görüşün favoriti bakılılardı. Düzdü, oyuna bosniyalılar tərəfindən maraq olduqca böyükdü. “Neftçi” dolu tribunalar önündə oynayacaq. Buna rəğmən, flaqmanın qələbə qazanmaq ehtimalı daha yüksəkdi. Çünki komandaların gücünə nəzər yetirsək, “ağ-qaralar” “dəmiryolçular”dan üstündü.

Bu komandalar da avrokuboklar tarixində ilk dəfə üz-üzə gəlir. Lakin “Neftçi” Bosniya və Hersoqovina klubları ilə qarşılaşıb. 2004/05 mövsümündə flaqman Çempionlar Liqasının təsnifat mərhələsində səfərdə “Şiroki Briyeq”ə məğlub olub – 1:2. Doğma meydanda isə 1:0 hesabıyla qalib gələrək mərhələni keçib.

İLKİN SULTANLI