Dünyanın ən baha 4-cü qapıçı transferi
“Mançester Yunayted” “İnter”dən aldığı qapıçı Andre Onananın transferini rəsmi şəkildə elan etdi.
"Football-plus.az" xəbər verir ki, 27 yaşlı kamerunlunun “qırmızı şeytanlar”la müqaviləsi 5 illikdi – 2028-in yayına qədər nəzərdə tutulan müqavilənin müddətini sonradan bir il də artırmaq olar. Transfer məbləği haqda bilgi verilməsə də, Avropanın ən nüduzlu insayderlərindən biri Fabritsio Romano söhbətin 50 milyon avrodan və əlavə 5 milyon bonusdan getdiyini deyir. “The Atletic” 51 + 4 milyon variantının üzərində dayanır. “Transfermarkt” isə öz növbəsində 52,5 milyon avrodan yazır.
Nə olur-olsun, sövdələşmənin həcmi aydındı və indi Onananın “İnter”dən MY-yə keçidi dünyada qolkiperlərin transferi baxımından dördüncüdü. Kamerunlu Canluici Buffona azacıq uduzur, ancaq əfsanəvi italiyalı “Parma”dan “Yuventus”a 2001-ci ildə keçib, onda hələ avro dövriyyəyə buraxılmamışdı, yəni onun transferinin qiymətləndirilməsində müəyyən şərtilik var.
Onana keçidin ardından ənənəyə uyğun olaraq, yeni klubunun ünvanına xeyli kompliment işlətdi:
“Mançester Yunayted”ə qoşulmaq qeyri-adi şərəfdi, buna nail olmaq üçün həyatım boyunca inadla çalışmışam, bir çox maneəni aşmışam. Qapını qorumaq üçün “Old Trafford”un meydanına çıxmaq və komandanın qələbəsinə töhfə vermək möhtəşəm təcrübə olacaq. Mənim üçün bu yeni yolun başlanğıcıdı. MY-nin qeyri-adi qapıçılarla bağlı tarixçəsi var. Mən də yaxın illərdə öz irsimi yaratmaq üçün mümkün olan hər şeyi edəcəm”.
Kamerunlu sosial şəbəkədə “İnter” azarkeşlərinə də vida məktubu yazıb:
“Bunun belə çətin olacağını düşünmürdüm. Bir il əvvəl “neradzurri” oldum. Çoxları deyirdilər ki, bu klub və şəhər xüsusidi. İndi bunu təsdiqləyə bilərəm. “İnter”dəki ilk günlərimdə anladım ki, bu ailədi. “İnterista” olmaq həyat tərzidi. “San-Siro”ya, “Kurvu Nord”a və şəhərə vuruldum. Şərait elə alınıb ki, “Mançester Yunayted”də yeni yola başlamalıyam. Entuziazmla doluyam, ancaq darıxacağımı da anlayıram. Bütün azarkeşlərə əbədi minnətdaram. Bu klubu böyük edən sizsiz. Bəlkə də bir dəfə yollarımız kəsişəcək, ancaq indi yeni çağırışların vaxtıdı”.
Beləliklə, Onana “İnter”dən niyə getdi?
Qolkiper vida məktubunda bu suala müəyyən mənada cavab verib. İlk növbədə şəraitin belə alındığını vurğulayıb. Onananı “İnter”dən zorla qoparmayıblar, sadəcə, klub ofisinə belə təklif daxil olanda dayanmaq çətindi. Unutmaq lazım deyil ki, “İnter” maliyyə çətinlikləri yaşayır. Bu çətinliklər bir neçə il əvvəl başlayıb. Klubun sahibi olan Çinin “Suning” şirkəti pandemiya və sərt lokdaunun, eləcə də yanlış idarəçilik qərarlarının əziyyətini çəkir. Üstəlik Çin Kommunist Partiyası belə hesab etdi ki, nəhəng biznes futbol menecmentinə hədsiz qaynayıb-qarışıb, bu üzdən belə xərcləri yoxlamaq lazımdı. İş o yerə gəlib çatdı ki, yerli liqada çıxış edən, zamanında braziliyalılar Ramireslə Aleks Teyşeyranın formasını geydiyi, Fabio Kapellonun ildə 10 milyon avroluq müqavilə ilə çalışdırdığı “Szyansu Sunin” klubu mövcudluğunu dayandırdı.
2021/22 mövsümü üçün olan maliyyə hesabatına görə, “İnter”in itkiləri 140 milyon avro təşkil edib, bir il əvvəl isə bu rəqəm 245 milyon idi. Prezident Stiven Çjan məhkəmələrdə kreditorlarla inadla çarpışır. Bu üzdən indiki vəziyyətdə Onanaya görə 50 milyon avro qazanmaq klub üçün əla sövdələşmədi.
Qapıçı özü isə Çempionlar Liqasında çıxış edən böyük kluba keçir, yaşı maaş alacaq (“İnter”də 3,8 milyon qazanırdısa, İngiltərədə ilə 7 milyon avro alacağı deyilir). Onun potensialını “Ayaks”da açan, indi isə MY-də görmək istəyən baş məşqçi amilini, Erik ten Haqı da unutmayaq. Təsadüfi deyil ki, Onana hörmətlə “usta” adlandırdığı mütəxəssislə yenidən birgə çalışmaq imkanını da xüsusi vurğulayır.
Onana MY-nin nəyinə lazımdı?
Qısaca ifadə etsək, kamerunlu ötürmə ilə oyun baxımından dünyanın ən yaxşı qapıçılarından biridi, top ayağında olanda özünü hədsiz inamlı hiss edir. Üstəlik Onana Ten Haqın tələblərindən yaxşı xəbərdardı və bunlara tam uyğun gəlir.
Yeri gəlmişkən, zərbələri qaytarmağı da bacarır. Onananın əla reaksiyası var, “9-luğ”a vurulan toplara uçmaq baxımından David De Xeadan zəif deyil. Çempionlar Liqasının son mövsümündə “Barselona” ilə ev (1:0) və ya “Portu” ilə səfər oyununa (2:0) baxmaq kifayətdi. Məhz Onananın qapısını qoruduğu “İnter” ÇL-də finala qədər irəlilədi. İndi isə qapıçı keyfiyyətlərini MY-yə uyğunlaşdırmağa və Ten Haqın rəğbətini yenidən qazanmağa məcburdu. Yəqin ki, bu məqamda onu Edersonla müqayisə etmək yerinə düşər. Braziliyalı dünyada top qaytarmaq baxımından heç də ən güclülərdən deyil, bununla belə, yetərincə etibarlıdı və ən əsası, Xosep Qvardiolanın sisteminə ideal şəkildə uyğun gəlir.
De Xea ilə yetərincə qalmaqallı ayrılıq olmasaydı, MY Onananı transfer edərdimi? Bir qədər sonra brataniyalı jurnalistlər bu sövdələşmə ilə bağlı bütün insaydları açıqlayacaq, ancaq bunlarsız da yuxarıdakl suala “bəli” cavabını vermək olar. Ten Haqa bir qədər köhnədəbli ispanın əvəzinə məhz belə qapıçı tipi lazım idi. De Xeanın gedişi, sadəcə, prosesi bir qədər sürətləndirməyə, hadisələri qabaqlamağa məcbur etdi. Yeni qapıçı nəhəng kluba məhz indi, ABŞ-a mövsümöncəsi turneyə yollanmaq ərəfəsində lazım idi.
Futbol tarixinin ən baha qapıçı transferləri
qapıçı hardan hara il məbləğ*
1. Kepa Arrisabalaqa Atletik Çelsi 2018 80
2. Alisson Roma Liverpul 2018 62,5
3. Canluici Buffon Parma Yuventus 2001 52,88
4. Andre Onana İnter Mançester Yunayted 2023 52,5
5. Ederson Benfika Mançester Siti 2017 40
* milyon avro ilə göstərilib, “transfermarkt”ın rəqəmi əsasında.
Digər xəbərlər
