Türkiyədə futbol mövsümünün başlamasına 3 həftə qalmış önəmli hakimlərdən biri ilə bağlı şok xəbər gəlib.

"Football-plus.az" xəbər verir ki, belə ki, FİFA hakimi Əli Palabıyıkın karyerasını bitirməsi haqda iddialar yayılıb. Bu iddianı ortaya idman yazarı Ömər Faruk Ünal atıb. Onun sözlərinə görə, bununla bağlı ən qısa müddətdə Türkiyə Futbol Federasiyasından da açıqlama gələcək. 41 yaşlı Palabıyıkın karyerası ötən mövsümün ortalarına qədər normal şəkildə davam edirdi. Ona avrokubok oyunları da həvalə olunurdu. Amma fevralın 2-də 22-ci turun “Adana Dəmirspor” – “Fənərbaxça” matçındakı (1:1) idarəçiliyindən sonra o, gözdən düşdü. “Fənər”in xeyrinə 2 penalti verməyən, eləcə də 1 qolunu saymayan Palabıyık o tarixdən sonra 3 aya yaxın məcburi istirahət etdi və aprelin sonlarında ona səhvini düzəltmək imkanı verildi. Amma 1-ci liqanın 35-ci turu çərçivəsində “Altınordu“ “Bandırmaspor” oyununda (3:3) meydan sahiblərinin xeyrinə verdiyi qalmaqallı penalti faktikionun karyerasına son qoydu. Çünki qayda pozuntusu olmayan epizodda penalti verən Palabıyık hətta VAR-ın məsləhəti ilə epizodu monitordan izlədikdən sonra da qərarını qüvvədə saxlamışdı!

Federasiya prezidenti Mehmet Büyükekşi də Palabıyıkı tənqid edərək ona bir də nə vaxt oyun veriləcəyini bilmədiyini vurğulamışdı. Ömər Faruk Ünalın iddiasına görə bu epizoddan sonra Hakimlər Komitəsinin şotlandiyalı baş məsləhətçisi, tanınmış sabiq hakim Hyu Dallas Palabıyıkla ayrıca söhbət edərək ona karyerasını bitirməyi məsləhət görübmüş. Palabıyık da bir neçə ay düşünəndən sonra onun məsləhətinə riayət etmək qərarına gəlib.

Qeyd edək ki, 1981-ci ilin avqustunda Ankarada doğulan Palabıyık 2012-ci ildən superliqa oyunlarına təyinat alırdı. 2015-ci ildən etibarən isə FİFA hakimi statusunu daşıyırdı.