Maliyyə çətinliklərinə baxmayaraq, “Barselona” “transfer bazarı”nda fəal şəkildə çalışır.

“Football-plus.az” xəbər verir ki, Kataloniya klubu iyulun ortalarına qədər artıq İlkay Gündoğan, Vitor Roke və İnyiqo Martinesin transferini tamamlayıb. Klub prezidenti Xuan Laportanın dediyinə görə, “blauqrana” yalnız bu oyunçularla kifayətlənmək istəmir. Ancaq yeni transferlərin reallaşması üçün “Barsa” indiki oyunçulardan bir neçəsi ilə vidalaşmalıdı. “Diario Sport” iddia edir ki, klub ABŞ-da keçirəcəyi mövsümöncəsi turneyə qədər aşağıda adı çəkilən altı futbolçunu ya satmaq, ya da icarəyə vermək istəyir.

Kleman Lanqle

“Barselona” və “Tottenhem” hazırda çalışırlar ki, müdafiəçi daimi əsasda İngiltərəyə köçə bulsin. “Mahmızlar”ın adı çəkilən futbolçuya görə 10 milyon avro ödəməyə hazır olduğu güman edilir, ancaq kataloniyalılar daha artıq qazanmaq niyyətindədi.

Niko Qonsales

Niko müntəzəm oyun vaxtı qazanmaq üçün icarəyə yollanacaq. İndiki məqamda gənc yarımmüdafiəçi üçün ən real görünən “dayanacaq” “Portu”du. Ondan həmçinin Oriol Romeonun transferində vasitə kimi yararlana bilərlər, yəni Nikonun La Liqada qalması da mümkündü.

Pablo Torre

Gənc yarımmüdafiəçi “Jirona”ya icarəyə verilməyə çox yaxındı. Pablo Torrenin komanda ilə birgə ABŞ turnesinə yollanmayacağı dəqiqdi. Xavi ona bel bağlamadığından, klub futbolçunu icarəyə verməyə hazırlaşır. Xatırladaq ki, Torre “Barsa”nın əsas komandasına ötən il “Rasinq”dən 5 milyon avroya transfer olunub, ancaq gənclər komandasının oyunçusu kimi qeydiyyatdan keçib. O, Xavinin rəbrərlik etdiyi komandanın heyətində ötən mövsüm keçirdiyi 13 oyunda 1 qol və 1 məhsuldar ötürmə ilə yadda qalıb.

Frank Kessye

Kessyenin gələcəyi dumanlı görünür. Çünki Kot d”İvuardan olan futbolçu “Barsa”nı tərk etmək istəmir. Bununla belə, yaxşı təklifləri də dinləməyə hazırdı. İtaliyanın bəzi klubları adı çəkilən futbolçu ilə maraqlansalar da, onun üçün 10 milyonda artıq pul ödəməyə hazır deyillər.

Aleks Kolyado

“Barselona” Kolyado ilə müqaviləni pozmağı planlaşdırır. “Betis” isə bunun fərqindədi və onu azad agent kimi heyətinə qatacağı anı sevinclə gözləyir.

Xulian Arauxo

Meksikalı futbolçunun “Las-Palmas”a icarəyə veriləcəyi gözlənilir. Bu komandanı yeni mövsümdən “Barsa B”nin əvvəlki baş məşqçisi çalışdıracaq. Bu məqam müdafiəçinin seçimində həlledici rol oynaya bilər. Arauxo indiki məqamda “Barsa”nın mövsümöncəsi toplanışına köklənib, ancaq Xavi istəyir ki, futbolçu Avropanın bir başqa komandasında oyun təcrübəsi qazansın.

Bernardo Silva yox, Lo Çelso

Baş məşqçi Xavi Ernandes yeni mövsüm ərəfəsində komandaya daha bir yeni və kreativ yarımmüdafiəçi cəlb etmək istəyir. Əslində Bernardo Silva “Barsa”nın əsas hədəfi idi, ancaq gündən-günə bu transfer mümkünsüz görünür. Bu üzdən rəhbərlik indi də gözünü “Tottenhem”dən Covanni Lo Çelsoya dikib. Argentinalı son mövsümyarımı La Liqada, konkret “Vilyarreal”da keçirib, odu ki, Xavinin gözündə münasib namizəddi. Lo Çelsonun kataloniyalılara 25 milyon avroya başa gəlməsi gözlənilir.

Gündoğan Barselonada təqdim olundu

Girişdə vurğuladığımız kimi, “Barselona”nın bu yaydakı ən möhtəşəm transferi İlkay Gündoğandı. Kataloniya klubu MS-nin heyətində trebl edən türk futbolçunu heyətinə qata bildi. Almaniya yığmasının iyundakı oyunlarında iştirak etdiyinə görə haqq etdiyi məzuniyyətdən yararlanan yarımmüdafiəçi şənbə günü Barselonaya gedib. İnternetdə İlkayın hava limanında klub əməkdaşları tərəfindən necə qarşılanması ilə bağlı videolar yer alıb. Bir detal fanatların diqqətini daha çox cəlb edib – futbolçu təyyarədən enərkən əynində kataloniyalıların məxsusi köynəyi olub. Ardından klub ofisində yarımmüdafiəçi üçün fotosessiya təşkil olunub, o özü də fanatlara kiçik videomüraciət ünvanlayıb: “Ey, kules! Bu İlkay Gündoğandı. Nəhayət, burda, “Barselona”da olduğuma və sizlə birləşdiyimə görə çox xoşbəxtəm. Yeni mövsümü və ilk oyunu səbirsizliklə gözləyirəm”.

İlkay klub saytına açıqlamasında birlikdə oynayacağına daha çox sevindiyi üç futbolçunun da adını çəkib. Bunlar Robert Levandovski, Mark-Andre ter Ştegen və Pedridi. Gündoğan 2011-14-cü illər aralığında Levandovski ilə Dortmund “Borussiya”sında oynayıb. Onların birlikdə keçirdiyi oyunların sayı 77-yə bərabərdi. Bundesliqanın qalibi olublar (2011/12), ölkə kubokunu (2011/12) və Superkubokunu (2013/14) qazanıblar.

Ter Ştegenə gəlincə, qapıçı İlkayla birgə Almaniya yığmasının şərəfini qoruyur. Nəhayət, 32 yaşlı futbolçunun gələn mövsüm Pedri ilə birgə necə oynayacağı da maraq doğurur. Şübhəsiz, ikisi də orta saəhədə hücum əməliyyatları ilə məşğul olacaq.

Artıq dünən İlkay “blauqrana”nın yeni oyunçusu kimi ictimaiyyətə təqdim olunub. “Barsa”nın başqa yığma oyunçuları da düşərgəyə dönüb. Komandanı qarşıda ABŞ turnesi gözləyir. Mövsümlərarası toplanışın ilk yoldaşlıq oyununda rəqib “Yuventus” olacaq. Turinlilərlə oyun iyulun 22-də Kaliforniyada keçiriləcək.

Laporta artıq çəkidən əziyyət çəkir

“Barselona”nın prezidentisənsə, deməli, daim diqqət mərkəzindəsən. Ancaq klubun rəhbəri bu dəfə futbolla bağlı fəaliyyətə görə gündəmdə deyil. Prezidentin müşaviri Enrik Masip onun artıq çəki problemindən danışıb: “Çoxları deyir ki, baxın, necə də kökdü...” Ancaq o kluba gəldiyi gündən bəri stress böyükdü. Komanda üç il çempionluğa həsrət qalmışdı. Mən prezidentin yanında olanda çox şeyə nəzarət edirəm. Ona deyirəm ki, “koka-kola” içmə, dərhal qabağından şirniyyatı yığışdırıram. Özümü atamla olduğu dərəcədə sərt aparıram, ona görə ki, Xuanla gözəl şəxsi münasibətlərimiz var. Onun qayğısına qalmağa çalışıram. Hər dəfə deyirəm ki, gəzmək lazımdı. Birlikdə idmanla da məşğul oluruq”.