“Papaq” kimi tanıdığımız, əsl adı “Evlənmək istəyirəm” filmində bir epizod var.

Mirzə Səfərin işlədiyi dəftərxanaya Həsən ağanın qardaşıoğlu daxil olur və mirzəyə deyir ki, Parisdən dünən qayıdıb, onun kağızı təcili yazılıb verilməlidi. Onu bir qədər danışdırandan, and içdirəndən sonra Mirzə Səfər də gözünü kağızdan ayırmadan deyir ki, “neynəyim Həsən ağanın qohumusan? Gəl, min boynuma!” Rəhmətlik Əbdürrəhim bəy Haqverdiyev bu ölməz əsəri bir əsr bundan əvvəl yazıb, düşünüb ki, dövrünün acı reallıqlarını satira diliylə tənqid etsin. Ümid edib ki, düzələcək. Amma bir əsr keçib, vəziyyət elə onda olduğu kimidi. Bəlkə də ondan daha pis. Heç nə vaxtsa müsbətə doğru dəyişikliyin olacağına inam da yoxdu.

Premyer-liqanın yeni mövsümünün başlamasına 20 gündən də az qalıb. Elitaya ad xətrinə gətirilən klublardan biri olan “Kəpəz”in nə stadionundan xəbər var, nə də avtobusundan. Futbolun İnkişafı Fondu kimi dəbdəbəli ada sahib təşkilatın cəhdləri də fayda vermir. İşin tərsliyindən Tərlan Əhmədova atılan badalaqlar fayda vermədi, Gəncə təmsilçisi elitanı tərk etmədi. Tərlan bəy mövsümün gedişində bezib postundan ayrılsaydı, çox güman, “Kəpəz” də turnir cədvəlinin son pilləsinə yuvarlanacaqdı. Beləcə premyer-liqanı tərk edən klub da “Kəpəz” olacaqdı. Ondan sonra divizionda xırda-para problemlərlə baş qatmaq, günü yola vermək çətinlik törətməzdi. Di gəl ki, bu plan baş tutmayıb, “Kəpəz” yenə də premyer-liqada mübarizə aparmalı, yerini qorumağa çalışmalıdı. Deməli, komandanın adı ətrafında yaşanan qalmaqallara, problemlərə də şahidlik etməyə davam edəcəyik.

Bu yaxınlarda “Kəpəz”in İdarə Heyətinin sədri İlqar Nadirinin qəzetimizə verdiyi açıqlamanı oxudum. Həmişə olduğu kimi, gəncəlilərin gününə ürəyim ağrıdı. Sitat: “AFFA-dan maddi yardımın ödənilməsi ilə bağlı hələ də bir xəbər gəlməyib. Bəzi nöqsanlar tapıb ümumi məbləğdən də kəsiblər. Əlbəttə, səhvsiz klub olmur. Amma tək dayağımız o vəsait olduğuna görə çətinliklərlə üzləşirik. İndiki şəraitdə mətanətli olmalıyıq”. Mən bu çətin və məşəqqətli yolda İlqar bəyə də, onun ətrafında olan insanlara da səbr və dözüm arzulayıram. Ümid edirəm ki, mətanətli olmağı bacaracaqlar, təslim olmayacaqlar. Bu həyatda hərənin bir dərdi olur. “Kəpəz”ə könül verənlərin, bu klub üçün çalışanların da dərdi belədi. Uca zirvənin adını daşıyan klub, ölkənin əzəməti ilə öyünən şəhərlərindən birinin təmsilçisi AFFA-dan gələcək yardıma gözünü dikib, “boz bina”da oturanların səxavəti sayəsində ayaqda durmağa çalışır. Onlar da hər dəfə bir bəhanə tapıb, “Kəpəz”ə ödənilməli olan pulu gecikdirirlər, hətta ucundan-qulağından da kəsirlər.
“Kəpəz”də ancaq gəncəli məşqçi çalışmalıdı, gəncəli futbolçu oynamalıdı” fəlsəfəsi çoxdandı ki, bu şəhərin havasına, klubun da canına hopub. Kənardan gələnlərin başına min bir oyun açıblar ki, mümkün qədər tez qaçsın, gəncəli mütəxəssislərdən kiməsə gün doğsun, iş yeri açılsın. “Kəpəz” həmişə AFFA üçün də, gəncəli veteranlar üçün də “yağlı tikə”, yaxşı qazanc yeri olub. Bir müddət əvvəl müdhiş fırıldaqların üstü açıldı, yeyinti faktları aşkara çıxdı. Düzdü, AFFA mümkün qədər məsələni sakitcə həll etməyə çalışdı, yeyinti faktlarının üstünü ört-basdır etməyə çalışdılar. Amma yenə də cidanı çuvalda gizlətmək mümkün olmadı. Elə həmin yeyintilərin dadı damaqlarında qaldığı üçün “Kəpəz”ə sahib çıxmaq, pula nəzarət etmək həvəsi həmişə vəhşi ehtiras kimi özünü biruzə verib. “Kəpəz”i geri salan çox vacib nüanslardan biri də məhz budu.

Gəncəli veteranların, ordakı müəyyən qrupların da öz maraqları var. İllər idi mətbuatı Mehman Allahverdiyevin Rusiyada yaşayan gəncəli iş adamları ilə görüşləriylə bağlı xəbərlər bəzəyirdi. İddia olunurdu ki, Mehman bəy “Kəpəz”də söz sahibinə çevrilən kimi həmin adamlar da komandaya pul buraxmağa başlayacaq. Allahverdiyev xeyli müddətdi klubda vəzifə tutur. AFFA bu üsulla onu və ətrafındakı qüvvələri neytrallaşdırıb. Tərlan Əhmədovun yola salınmasından sonra komandanın baş məşqçisi Azər Məmmədovdu. Yəni gəncəli mütəxəssis “Kəpəz”in baş məşqçisidi. Hanı o sponsor olmaq istəyənlər? Mehman Allahverdiyev nə üçün imkanlı şəxslərə çağırış etmir? Gəncəli azarkeşlərin gözü yolda, qulağı səsdədi. Onlar xoş səda gözləyir. Əvəzində eşitdikləri odu ki, Xaliq Mərdanovla Azər Məmmədov arasında gərginlik yaranıb, birincini əsas komandadan uzaqlaşdırıblar. Bu məlumatın həqiqət olmadığına bizi inandırmağa çalışanlar da deyir ki, Mərdanov Məmmədovla kirvədi, onların arasında söz-söhbət ola bilməz. Təki belə olsun, Allah kirvələri daha da mehriban eləsin. Amin deyək!

AMAL