“Oyuna hazır olmadığımın fərqindəydim. Çünki cəmi 4-5 dəfə məşq edə bilmişdim. Yəqin ki, buna görə baş məşqçimiz meydana 2-ci hissəda daxil olmağımı məsləhət bildi. Sanki orda mənə Allah tərəfindən əlavə güc-qüvvə verilmişdi. Özümü gümrah hiss edirdim. Onu deyim ki, oynamağa başladığım ilk saniyələrdən sona qədər erməni azarkeşlər məni fitə basdı. Çox güclü təzyiq var idi. Lakin bu amilin məni yormasına, geri çəkilməyə məcbur etməsinə icazə verə bilməzdim. Psixologiyamı möhkəm saxladım və meydanda olduğum bütün saniyələrdən maksimum yararlanmağa çalışdım. Qol vura bilməsəm də, düşünürəm ki, əlimdən gələn hər şeyi etdim. Matçdan sonra Edlir Tetova mənimlə söhbət etdi. Narahat olmamağımı istəyərək, yaxşı performans sərgilədiyimə görə təşəkkür etdi. Komandada yeni olsam da, üzərimdə işlədiyimə, məşqlərdə fəal iştirak etdiyimə və xüsusilə bu oyunda istəkli olduğuma görə təşəkkürünü bildirdi. Təzyiqlərə qayıtsaq, uzun müddət qıcıqlandırıcı hərəkətlər edildi. Çalışırdım ki, gülüb keçim, vecimə almayım. Ermənilərin çoxunun dilində bir sual var idi: “qorxmadın bura gəlməyə?”. Cavab verirdim ki, niyə qorxmalıyam, qorxacaq nə var ki? Mən futbolçuyam və bura futbol oynamağa gəlmişəm. Çox istəyirdim ki, qol vurum. Təəssüf ki, alınmadı. Həm də qol vursaydım, əsgər salamı ilə qeyd edəcəyimi demişdim. Bunu etməməyimi istəmişdilər. Hansısa fiziki təzyiq və ya təmas halları ilə üzləşmədim. Təhlükəsizlik tədbirləri yüksək səviyyədə təşkil olunmuşdu. Nəzarətçilər səfərin əvvəlindən sonadək mənimlə maraqlandılar və vəzifələrini layiqincə yerinə yetirməyə çalışdılar. Hazırda Türkiyədəyik. Ermənistandan Albaniyaya birbaşa uçuş olmadığına görə İstanbula gəlmişik. Albaniyaya qayıdıb cavab matçına hazırlaşacağıq. O vaxta qədər məşqlər intensivləşəcək. İnanıram ki, həmin oyunda daha yaxşı vəziyyətdə olacam. İnşallah, “Ararat”ı Albaniyada məğlub edəcəyik. Artıq formaya düşmək üçün ayrılan vaxtın sonuna çatıram. Çalışıram ki, həm komandama, həm də Roqojinə tez uyğunlaşım. Əsas odu ki, özümə inanıram. “Eqnatiya”nın bütün heyəti mənə güvənir və hər dəfə motivasiya verir”.