Beynəlxalq Futbol Tarixi və Statistikası Federasiyası (BFTSF) bu yaxınlarda futbolsevərlərlə maraqlı bir statistika bölüşüb.

"Football-plus.az" xəbər verir ki, federasiya karyerası ərzində penaltidən ən çox qol vuran futbolçuların siyahısını müəyyənləşdirib.

Siyahıda birinci pillədə hansı futbolçunun qərarlaşdığını tapmaq o qədər də çətin məsələ deyil. Söhbət, təbii ki, hazırda “Əl-Nəssr”in şərəfini qoruyan Kriştiano Ronaldodan gedir. Portuqaliyalı ulduz əsrarəngiz karyerası ərzində 838 qoldan 151-ni penaltidən vurub! O, bunlardan 102-ni milli çempionatlarda, 10-nu milli kuboklarda, 21-ni avrokuboklarda və 18-ni yığma komandada vurub. Amma burda ən diqqətçəkən məqam Kriştiano ilə ən yaxın izləyicisi arasındakı fərqdi. Siyahıda 2-ci pillədə Romario qərarlaşıb. Ötən əsrin 90-cı illərinin ən parlaq oyunçularından olan “sambaçı” penaltidən 114 dəfə fərqlənib. Yəni 1-ci pillə ilə 2-ci pillə arasında 37 topluq fərq var. İlk “3-lüy”ü 113 qolla Ronald Kuman tamamlayır. İlk “6-lıq”da Ronaldodan başqa karyerasını davam etdirən daha bir futbolçu var. Bu da Kriştianonun əzəli rəqibi Lionel Messidi. Argentinalı ulduz karyerası ərzində penaltidən 103 qol vurmaqla siyahıda 4-cü pillədə qərarlaşıb. Yəni Leo Kriştianodan 43 penalti az vurub. Karyerasının ən vacib penalti zərbəsini qaçırmaqla yaddaşlarda iz buraxan italiyalı əfsanə Roberto Baco “nöqtə”dən 100 dəfə fərqlənməklə 5-ci pillədə qərarlaşıb. 6-cı pillə isə 96 penalti qolu ilə əfsanəvi meksikalı forvard Uqo Sançesə qismət olub.