Yaxın keçmişin önəmli forvardlarından olan, hazırda Kamerun Futbol Federasiyasının prezidenti vəzifəsini icra edən Samuel Eto'Onun qızı Erika Do Rosario Nyeves onun həbs olunmasını tələb edir.

“Football-plus.az” xəbər verir ki, məsələ burasındadı ki, ötən ilin fevralında ''Barselona'', ''İnter'' və Kamerun yığmasının sabiq forvardı 4 illik məhkəmə proseslərindən sonra Nyevesin öz qızı olduğunu qəbul etmişdi. Məhkəmənin qərarı ilə Eto'O bu prosesin başından etibarən qızına aylıq 1400 avro ödəməli idi. Amma sabiq futbolçu aliment ödəməkdən boyun qaçırır. O, beş ildi, qızına heç nə ödəmir. 24 yaşlı xanımın vəkili Fernando Osuna bildirib ki, Eto'Onun onun müştərisinə 90 min avro borcu var: ''Samuel öz qızına 5 ildi, aliment ödəmir və ümumiyyətlə ödəmək barədə düşünmür. Erikanın maddi durumu çox da yaxşı deyil. Eto'O isə var-dövlət içində yaşayır''.

Bundan başqa vəkilin sözlərinə görə Eto'Onun indiyə qədər məhkəmələrdə yaşadığı problemləri nəzərə alanda onun Kamerun Futbol Federasiyasının prezidenti vəzifəsində olması normal bir durum deyil. Eto'O daha öncə İspaniyada vergilərdən yayınmaqda və eləcə də daha bir nigahdan kənar qızına aliment ödəməməkdə günahlandırılmışdı. Erika Do Rosario Nyeves Eto'Onun bir illiyə həbs olunmasını tələb edir. Bu məsələyə Madrid məhkəməsində baxılacaq.

Qeyd edək ki, Eto'O ilə Adileus adlı xanım 1997-ci ildə Madriddəki gecə klublarından birində tanış olublar. Həmin vaxt ''Leqanes''də çıxış edən futbolçunun cəmi 16 yaşı var idi. 1998-də Adileus hamilə olduğunu bildirdi. Eto'O onun abort elətdirməsini istəyirdi. Amma Adileus 1999-da Erikanı dünyaya gətirdi. Bundan sonra Samuel onunla bütün əlaqələrini kəsdi. Adileus uzun müddət bioloji sübutlar axtararaq 2018-də Eto'Onu məhkəməyə verdi. Yalnız 4 ildən sonra məhkəmə Eto'Onun uşağın atası olması qərarını verdi. Onu da bildirək ki, 42 yaşlı Eto'Onun hazırda rəsmi olaraq 6 (5 qız, 1 oğlan) uşağı var. Amma onlardan yalnız ikisi onun həyat yoldaşı Jorjettadandı. Bu cütlük 2007-dən ailəlidi. Digər 4 uşaq isə 3 fərqli qadındandı.