"Son iki görüşdə uduzduğumuzdan, uşaqlarda revanş istəyi var" - Canni De Byazi
“Ümid edirəm ki, Avstriya və İsveçlə matçlar təcrübəsi az futbolçular üçün dərs olar”.
"Football-plus.az" xəbər verir ki, bunu Azərbaycan millisinin baş məşqçisi Canni De Byazi Estoniyaya qarşı keçiriləcək AÇ-2024-ün seçmə mərhələ oyunu öncəsi mətbuat konfransında deyib.
Qarşılaşmanın baş tutacağı “Dalğa Arena”da təşkil olunan tədbirdə italiyalı mütəxəssis əvvəlcə qrupun ilk iki qarşılaşmasındakı uğursuzluğa toxunub:
“İlk iki oyunda uduzduq, 9 qol buraxdıq. İki güclü komanda ilə qarşılaşdığımızı da nəzərə almalıyıq. Həm Avstriya, həm də İsveçlə görüşün bəzi hissələrində yaxşı çıxış etdik. Təbii ki, individual səhvlər oldu, bu da bizə baha başa gəldi".
67 yaşlı mütəxəssis son 7 qarşılaşmada tətbiq etdikləri sistemin uğurlu olduğunu düşünür:
“Bu sistemdə yaxşı nəticələr göstərdik, 5 qələbə qazandıq. Düzdü, son iki görüşdə uduzmuşuq, bu da futbolda baş verir”.
Baş məşqçi azarkeşlərin Estoniya üzərində qələbə gözləməsinin onlarda psixoloji gərginliyə yol açacağına inanmır:
"Son iki görüşdə uduzduğumuzdan, uşaqlarda revanş istəyi var. Estoniyada mövsümün gedişidi. Bu, vacib amildi. Ancaq yenə də ümid edirəm ki, sabah 3 xal qazanacağıq. Ola bilər ki, bəzi oyunçular bu tempdə oynamağa öyrəşməyiblər. Əgər başqa çempionata öyrəşmisənsə və rəqibin böyük liqalarda çıxış edirsə, çətinliklə üzləşəcəksən. Bizim matçlardakı inkişafı görmürüksə, deməli, özümüz görmək istəmirik”.
De Byazi Estoniya önünə qələbə üçün çıxacaqlarını əlavə edib:
“Rəqibin Avstriya ilə oyununu izləmişəm, yaxşı çıxış ediblər. Futbol riyaziyyat deyil. İstənilən halda sabah qələbə üçün əlimizdən gələni edəcəyik. Bilirəm ki, futbolçularımızda yorğunluq var. Ancaq uğur qazanmaq üçün rəqibdən çox qaçmalı, böyük enerji sərf etməliyik”.
O, hücumçu Mahir Emrelinin start heyətində yer alacağını və son vaxtlar çıxış etdiyi mövqedə yer alacağını vurğulayıb.
Qeyd edək ki, iyunun 17-də keçiriləcək Azərbaycan – Estoniya matçı saat 20.00-da başlayacaq.
Digər xəbərlər
