"İlk növbədə "Qəbələ"ni təbrik edirəm. Meydanda özlərini yaxşı tərəfdən göstərib layiqli qələbə qazandılar. Çox həvəsliydilər. "Neftçi"yə gəlincə, varlıqları hiss olunmadı. Komandanı tanıya bilmədim. Sanki kuboku qazanmaq istəmirdilər, fikirləri başqa yerdə idi. Son ana qədər mübarizə aparacaqlarını gözlədiyim halda, fərqli əhval-ruhiyyə ilə çıxış etdilər. Nə yalan deyim, heç xoşuma gəlmədi. Arzulayırdım ki, "Neftçi" qalib olsun. İstək, qələbə qazanmaq eşqi ilə oynadıqlarını göstərib uduzsaydılar, onları bağışlamaq olardı. Saysız-hesabsız azarkeşlərlə yanaşı, məni də məyus etdilər. Oyun yadıma düşdükcə əsəbləşirəm. "Neftçi"nin çox geniş və sadiq azarkeş kütləsi var. Elə ürəkli, futbolsevər şəxslərin dəstəklədiyi komandanın çempionluqdan başqa hədəfi ola bilməz. Nə yerli, nə də legioner futbolçular hansı komandanı təmsil etdiklərinin fərqinə varır. Xüsusilə əcnəbilərin komandaya xeyri yoxdu. "Neftçi"ni təmsil etməyin, o heyətdə yer almağın necə böyük şərəf olduğunu dərk etmirlər. Komandada dəyişikliklər olmalıdı. Futbolu sevən, futbolla yaşayan şəxslər, azərbaycanlılar "Neftçi"yə sahib çıxmalıdı. Məşqçilər korpusunda bir yerli mütəxəssis yoxdu. Düzdü, baş məşqçi öz heyətini gətirir, bu öz yerində. Bəs niyə heyətə yerli mütəxəssis cəlb olunmur? Heç olmasa, köməkçi məşqçilərdən biri yerli olmalıdı. Rəhbərlik belə çətin vəziyyətdən çıxış yolunu dərhal tapmalıdı".