"Uzun müddətdi kəskin mübarizə şəraitində gərgin oyun izləmirdik. Qarşılaşma son dönəmdə keçirilən matçların yaraşığı oldu. Sözün düzü, "Neftçi"nin bu qədər aciz performans sərgiləyəcəyini gözləmirdim. Digər tərəfdən, "Qəbələ"nin incə toxunulmuş strategiyalı və strukturlu oyun tərzi möhtəşəm alındı. Bölgə təmsilçisində hücumların təşkili, rəqibə pressinq edilməsi, məntiqli taktikalar göz oxşayırdı. Elmar Baxşıyevin komandası aşkar şəkildə "Neftçi"ni üstələdi. Bakılılar bəzən ayrı-ayrı futbolçuların fərdi ustalığı və keyfiyyəti sayəsində önə çıxsa da, bu yetərli olmadı. "Qəbələ" daha çox qol fürsəti əldə etdi. Hesabın fərqli olmaq ehtimalı yüksək idi. Gah qapıçı İvan Brkiç cəld davrandı, gah da futbolçuların zərbəsi qeyri-dəqiq alındı. Ümumiyyətlə, "qırmızı-qaralar" haqlı qələbə qazandı. Burda bəxt amilindən danışmağa dəyməz. Bütün hissələrdə bölgə təmsilçisinin həvəsli və istəkli olduğunu, meydanda can qoyduğunu gördük. Bunu matçdan sonra "Neftçi"nin futbolçusu Voislav Stankoviç də mətbuata açıqlamasında etiraf etdi. Bundan sonra baş məşqçi Laurentsiu Regekampfı postunda necə saxlamaq olar? Getməlidi. Bilmirəm, nə deyib saxlayacaqlar? O vaxt Samir Abasovu kənarlaşdırdılar. Halbuki ötən mövsüm ərzində yerli məşqçilərin nələrə qadir olduğunu gördük".