“Komandanın potensialını öyrənmək məqsədilə ikinci təlim-məşq toplanışını həyata keçirdik. Çox təəssüf ki, hər iki oyun arzulamadığımız hesablarla yadda qaldı. Birinci matçda zəif çıxış etdiyimizi deməzdim. Uşaqlar tapşırıqları yerinə yetirməyə çalışdı. Taktiki gedişlərdə özlərini yaxşı tərəfdən göstərdilər. Komandaya faydalı oyunçuları seçə bilmək üçün digər futbolçuları da yoxlamaq lazım idi. İkinci qarşılaşmada heyətdə dəyişikliklər oldu. Bu dəfə işlər yolunda getmədi.

Komandanın parlaq gələcəyi üçün görüləcək işlər çoxdu. Uşaqların üstün cəhətləri azdı. Əvəzində xeyli çatışmazlıqlar var. Problemlərin üzərində işləmək lazımdı. Ən əsası, oyunçular milli komanda üzvü olmağın məsuliyyətini dərk etməlidi. Çünki qarşıda daha çətin matçlar olacaq. Ümid edirəm ki, bundan sonrakı oyunlarda uğurlu çıxış edə biləcəyik”.