Misli premyer-liqasının 35-ci turunda "Neftçi" səfərdə "Kəpəz"i 3:1 hesabı ilə məğlub etdi. Görüşdə başverənlərdən xəbəriniz var. Diqqətimizi çəkən məqam oyundan sonra yaşandı.

Mətbuat konfransında Laurentsiu Regekampfa "şayiələr gəzir ki, xarici klublardan təklifləriniz var. Bu haqda məlumat verə bilərsizmi" sualı ünvanlandı. Rumıniyalının cavabı belə oldu: "Şayiələri şərh edə bilmərəm. Deyə bilərəm ki, burda olacam". Artıq bu rəsmi şəkildə açıqlanmış fikirdi. Amma doğruluğu nə dərəcədə realdı? Gəlin, bunu izah edək.

Kubok mütləq qazanılmalıdı

Regekampf düşünür ki, "Neftçi"də qalacaq. Buna əmin olmasının səbəbi ölkə kubokunun finalında "Qəbələ"ni məğlub edəcəyinə arxalanmasıdı. Əslində flaqmanın bu titulu qazanmaq şansı yüksəkdi. Heyət bunu deməyə əsas verir. Bu səbəbdən də klub rəhbərliyi baş məşqçidən bunu tələb edir. Bir sözlə, kubokun qazanılması Regekampfın "Neftçi"də qalmaq ehtimalını gücləndirəcək. Əks halda rumıniyalı yola salınacaq.
Prioritet Konfrans Liqasının qrupudu

Regekampf kubokun qalibi olmaqla canını qurtara bilməyəcək. Müşahidə Şurasının sədri Rövşən Nəcəfin əsas tələbi "Qarabağ" kimi güclü kollektiv formalaşdırmaqdı. SOCAR rəhbəri həmçinin komandasının müntəzəm avrokuboklarda çıxış etməsini istəyir. Bu səbəbdən də rumıniyalı mütəxəssisin yayda işi çətin olacaq. Çünki onun üçün əsas tapşırıq Konfrans Liqasının qrupuna vəsiqə qazanmaqdı. Bu öhdəlik yerinə yetirilməzsə, Regekampf komandadan göndəriləcək.

Regekampın arzusu premyer-liqanın qalibi olmaqdı

"Neftçi"nin baş məşqçisi başqa klublarda çalışarkən uğurlar əldə edib. Bakıda isə hələ ki işlər yolunda getmir. Bu səbəbdən də kuboku qazanmaq istəyir. Onun "Neftçi"dən getməməsinin əsas səbəbi də məhz budu. Rumıniyalı rəhbərlikdən güclü heyət formalaşdırılmasını istəyir ki, növbəti mövsüm Misli premyer-liqasında çempionluq mübarizəsində iştirak etsin.
Yayılan xəbərlərin səbəbi var

"Neftçi"ni idarə etmək çox çətindi. Çünki həm daxildən, həm də xaricdən təsirlər var. Klub həmişə ön planda olub. Bunun Regekampfa nə dəxli var? Rumıniyalı mütəxəssis açıqlamalarının birində qeyd etmişdi ki, rəhbərliklə uzunmüddətli planları var. Yəni yuxarıda qeyd olunanlar - kubokda qələbə və Konfrans Liqasının qrupuna vəsiqə təmin olunsa, SOCAR rəhbəri çempion heyət qurmaq üçün normal maliyyə ayıracaq. Bunu bilən bəzi şəxslər prosesin baş verməsini istəmir. Onlar "Neftçi"nin problem içində olmasını istəyir ki, Rövşən Nəcəf əvvəlcə baş məşqçini, daha sonra klubun rəhbərliyində yer alan şəxsləri uzaqlaşdırsın. Regekampfın gedəcəyi ilə bağlı xəbərlər də məhz həmin qüvvələrin şifarişi əsasında yayılır.
Beləliklə, "Neftçi" və Regekampf hazırda böyük məngənənin içindədi. Bu söz-söhbətlərin ən azı payıza kimi səngiməsi üçün ilk növbədə ölkə kubokunun qalibi olmaq lazımdı...

İLKİN SULTANLI