“Özümüzü hazır sayırıq. Planlar böyük ölçüdə həyata keçirilib. Kiçik işlər qalıb ki, onlar da qısa zamanda həllini tapacaq. Maliyyə cəhətdən heç bir problem yoxdu.

Stadionda görülən işlər barədə əvvəl də məlumat vermişdik. Sadəcə, ot örtüyünün dəyişdirilməsi qalıb. Bir şirkətlə bu istiqamətdə razılıq olub. İki ay ərzində süni örtüklə təmin ediləcək. VAR otağı, işıqlandırma, tribunalar, media üçün əlverişli şərait, digər otaqlarla bağlı çalışmalar yekunlaşmaq üzrədi. Stadion hər cəhətdən tam müasir texnologiyalara uyğun təchiz olunur.

Aşağı yaş qrupları ilə bağlı görülən işlər də qaydasındadı. Onlar arasında çempionatlar təşkil olunur. Məşqlər davam edir. Çalışdırıcılar məsuliyyətlə vəzifələrini yerinə yetirir. Plana uyğun bəzi qruplar Bakıda məskunlaşacaq. Bunun səbəbi isə Naxçıvandakı uşaq çatışmazlığıdı. 11-12 yaşlılar var ki, sayları çempionat keçirmək üçün yetərli deyil. Bundan başqa, U-19 və U-21 komandalarının da mütəmadi təlim-məşq toplanışları nəzərdə tutulur.

Bir daha vurğulayım ki, maddi problemlər yaşayacağımızı düşünmürük. Buna rəğmən, gəlir mənbələri üzrə çalışırıq. Üç istiqamətdə işlər görülür – sponsor, təchizat, tərəfdaşlıq. Danışıqların davam etdiyi və bəziləri ilə artıq razılaşdığımız şirkətlər var ki, onlarla yüksək səviyyəli tərəfdaşlıq münasibətlərimiz olacaq. Səfər oyunlarının təşkili üçün lazım olan maliyyədə problem yaşamamaq üçün bu meyarların təmin edilməsi üzərində çalışırıq. Qarşıda 2 aydan çox vaxt var. Bu dönəmdə bütün işlər başa çatacaq”.