Azərbaycan kubokunda yarımfinal mərhələsinə start verilib.

"Football-plus.az" xəbər verir ki, "Qəbələ" "Səbail"i qəbul edib - 3:2. Matçdan sonra qonaqların çalışdırıcısı Şahin Diniyevin mətbuat konfransı keçirilib. Sizi mütəxəssisin fikirləri ilə tanış edirik:

- Rəqiblər sizinlə oyunlarda arxayınlaşır?
- Biz hər iki cəbhədə vuruşuruq. Çempionat da bizim üçün çox vacibdi. Amma bu o demək deyil ki, kubokda təslim olacağıq. Harada şansımız var, maksimumu etməliyik. Çempionatda da uğurlu matçlarımız var idi, bu da arxasıdı, gəlir.

- Cavab matçında rotasiyalar olacaq, yoxsa döyüşkən heyət görəcəyik?
- Fikirləşəcəyik. “Neftçi” ilə çempionat oyunundan sonra da futbolçuların durumu çox vacibdi. Udmaq üçün mütləq hücum etməliyik. Kubok elədi ki, iki oyunda da taktiki cəhətdən ağıllı oynamalısan. Əvvəl səfər qolunun vacibliyi var idi ki, çox gözəl qaydaydı. Sonradan ləğv edildi. Bizə indi qələbə vacibdi. Buna görə də daha çox hücumameyilli futbolçulardan istifadə edəcəyik. Finala çıxmaq istəyiriksə, hücum etməliyik. Şanslar bərabərdi. Bir-birinə bənzəməyən iki matç olacaq.

- Cavab qarşılaşmasında cütün taleyi penaltilərə qalsa, qapıda hansı qolkiper dayanacaq?
- Start heyətində meydana hansı qapıçı çıxacaqsa, sona qədər də dayanacaq.

- Samir Abasov deyib ki, heç bir komandanın premyer-liqadan düşməsini istəmədiyini deyib...
- Bir fikir deyəndə, ikiyə bölünür. Yəqin ki, deyəcəyim söz bir həftə də müzakirə olunacaq. “Sumqayıt”, “Şamaxı”, “Kəpəz”, “Səbail”in 11-12 komandası var. U-9, U-11, U-15 necə olacaq? Əsas komandanı kənara qoyuram, yaxşı 30 futbolçu itdi, bəs qalanları? 11-12 yaşlılardan ibarət komandaların taleyi necə olacaq? Demirəm ki, biz düşürüksə, bizi saxlayın. Dörd komandanın taleyindən danışmışdım. Yerimizə gələcək klubun 12 fərqli komandası varsa, razıyam. Yəni, uşaqlar itməyəcək. Hazırki liqadakı klubların hamısının akademiyası var.

- Bu mövsüm əvəzedici heyətdən əsas komandaya cəlb olunanlar azdı. Bu nə ilə bağlıdı?
- İki məqam var. Birincisi odu ki, gənc limiti olanda məcburiyyətdə iki oyunçu götürə bilirdin. Mən gənclərə yol vermək istəyən məşqçilərdənəm. Təcrübə nəticə deməkdi, gənclik nəticə deyil, sabaha ümiddi. Biz də bugünkü gündə sabahı yox, bu günü düşündüyümüz üçün oyunlar vacibdi. Gənclərə yer verə bilmirik. Əvəzedici heyətdə yaxşı oyunçularımız var. Onlara məşqlərdə yer veririk.

- Hansısa komanda premyer-liqada qalmağı bacarmırsa, AFFA-dan "bizi saxlayın, hamımızı saxlayın" istəyi nə dərəcədə doğru və ədalətlidi? Divizionda olsanız da, akademiyanız fəaliyyətini davam etdirə bilməz?
- UEFA-nın tələbləri var. Ona əsasən premyer-liqadakı klubun bayaq dediyim qədər aşağı yaş qrupu olmalıdı. Amma UEFA-nın tələbində divizionda oynayan komandanın akademiyası olmasa da, oynaya bilər.

- Peşəkar yanaşırıqsa, demək ki, divizion klubu da akademiya saxlaya bilər də...
- Əlbəttə. Bəs büdcə?

- Sponsorunuz yoxdu? Onlar premyer-liqada qalacağınız təqdirdə, sizə sponsorluq edəcək?
- Bu mənə aid sual deyil. Dövlət tərəfindən ayrılan pulla saxlamaq olursa... Bu gün əsas komandada perspektiv yoxdusa...

- Bir il sonra qayıtmaq olar da premyerliqaya...
- Kim qaranti verə bilər?

- Rəhbərlik...
- Biz harada yaşayırıq?