“8 ildi eyni problemlərdən danışırıq. Dəfələrlə çatışmazlıqlar barədə federasiya prezidenti ilə müzakirələr aparmışam. U-19 yığmasını çempionata buraxmaqla iş yekunlaşmır. Bu uşaqlar uzağı bir il bu komandada oynayır. Sonra? Çempionatda komanda sayı az olduğundan yetərincə oyun təcrübəsi qazanmırlar. U-21 yığması da olmalıdı. U-19-da çıxışını başa vuranlar ən azı 3 il də orda oynaya biləcəklər. Düzdü, indi U-17 və U-19 var. Ancaq inkişaf üçün yetərli deyil.

Yığmanın seçmə mərhələdəki çıxışına gəlincə, bizim uşaqlar 4 günə 3 oyun keçirməyə hazır deyil. Belə oyun ritminə hazır olmaq üçün güclü çempionatın olmalıdı. Bu uşaqlar həftədə maksimum 1 oyun keçirir. Bəli, rəqiblər də qitənin aparıcı komandaları deyildi. Ancaq müxtəlif səbəblərdən yığmanın çıxışı uğursuz oldu. Birincisi, son anda Ağatahir Əzimov komanda ilə səfərə çıxa bilmədi. İkincisi, son iki oyunda qeydə alınan məğlubiyyətlərin əsası Fransa ilə matçda qoyuldu. Yığma fransızlara belə uduzmamalıydı. İkinci, üçüncü qarşılamada futzalçılar ilk yenilgidən doğan psixioloji sarsıntıdan özlərinə gələ bilmədi. Yunanıstanla qarşılaşmada komandanın 4 aparıcı oyunçusunun zədəli olması da sözünü dedi.

Sabaha ümid var? Təbii ki, var, ancaq gənclərə daim oynamaq lazımdı. Bunun üçün daxili çempionatda komanda sayını artırmaq, səviyyəni yüksəltmək lazımdı”.