“0:5 tarix ərzində ən böyükhesblı yenilgimiz deyil. Azərbaycanlı futbolsevərlər Serbiyadan, Portuqaliyadan, Polşadan, Fransadan daha çox qol yeyən milli görüb və əlbəttə ki, daha dözümlü olub. Məncə, millimizlə qürur duymalıyıq. Sinyor De Byazi deyirsə ki, əla oynamışıq, biz nə kərayək ki, əksini iddia edək?! Sarkazmı kənara qoysaq, açıq suallar qaldı. Adil Nağıyevi milli üçün “kəşf edən” italiyalının Lüksembuqla matçda “ağzı bala batmışdı”. Avstriya ilə görüşdə də Bəxtiyar Həsənalızadəni bizə nümayiş etdirmək istədi. Axı, biz Bəxtiyarın oyunçu keyfiyyətlərinə bələdik. 31 yaşında millidə parlayacaq səviyyədə olmadığını bilmək üçün Avstriya ilə görüşü qurban vermək lazım deyildi. Höccətlə bağlı da “iki ayağını bir başmağa dirəməsi” anlaşılan deyil. Bu adam sağ cinahda yararsızdı! Çempionatın, demək olar ki, bütün matçlarında “Sabah”ın start heyətində meydanda olan Amin Seydiyevin, ola bilər ki, düşüncə qabiliyyəti bir qədər axsayır. Ancaq sağ cinahda necə düzgün müdafiə olunmağı bu adam bilir və bacarır. “Çərçivə”yə gəlincə, Yusif İmanovu skandinavlarla matçda meydana buraxmamaq səhv idi. Bir halda ki, güvənmişdin, gərək sonadək arxasında dayanaydın.

Həmişə demişəm ki, nə vaxt milli qrupdan ən azı pley-offa çıxmaq potensialında olarsa və bunu bir neçə tsikl ərzində yerli mütəxəssislə bacarmazsa, əcnəbi baş məşqçi axtarışına çıxmaq olar. Bu milli 5 ulduzlu oteldə qalmağa layiq deyil! Bu milliyə çarter reysi də haramdı. Baş məşqçi kimi Ayxan Abbasov və ya Tərlan Əhmədov daha uğurlu olar. Dediklərim həyata keçsə, millinin xərcləri nəzərəçarpan dərəcədə azalacaq. Bax, həmin vəsaitlə aşağı yaş qrupları üzrə seçilən komandaları beynəlxalq turnirlərə yollamaq olar. Onsuz da indiki nəsildən heç nə olan deyil, heç olmasa, 8-10 il sonra üçün bünövrə formalaşdıraq”.