Xəbər verdiyimiz kimi, Cennaro Qattuzo ilə vidalaşan “Valensiya” artıq yeni baş məşqçisinin adını açıqlayıb – komandanı uçurumdan 47 yaşlı Ruben Baraxa çıxarmalıdı.

Bunu adi təyinat kimi qiymətləndirmək olmaz. Baraxa, sadəcə, növbəti məşqçi deyil, yerli əfsanədi. O, 10 il bu komandanın şərəfini qoruyub, Rafael Benitesin vaxtında iki çempionluq, İspaniya kubokunu, UEFA kubokunu, Avropa Superkubokunu qazanıb, Çempionlar Liqasının finalında oynayıb.

“Yarasalar”ın kapitanı Xose Qayya bu təyinatı sevinclə qarşılayıb: “Lap uşaqlıqdan “Valensiya” ilə yaşayıram. And içə bilərəm ki, hər yerli uşaq Ruben Baraxanın kim olduğunu bilir. Həqiqətən onunla qürur duyuram. Əminəm ki, Baraxanın gəlişi ilə bütünləşəcək və ağır mövsümü düzəldəcəyik”.
Həqiqətən də Valensiyada Rubeni çox sevirlər, hərçənd məşqçi ustalığı baxımından onun öyünəsi heç nəyi yoxdu. İspaniyalı ulduz 2015-ci ildə “Elçe”nin “sükanı arxasına” keçsə də, cəmi bir mövsüm işləyib, ardından daim iş yerini dəyişib və heç yerdə uğur qazanmayıb: “Rayo Valyekano”dan tutmuş “Saraqosa”ya qədər. “Valensiya” onun karyerasında ilk ciddi seçimdi.

Baraxa prezident üçün qalxandı

“Mundo Deportivo”nun yazdığına inansaq, “Valensiya” əvvəldən əfsanəni dəvət etməyi planlaşdırmırmış. Prezident Piter Lim “Əl-İttihad”da məşğul olan Nunu Eşpiritu Santu ilə təmasa keçib. 2010-cu illərin ortalarında “yarasalar”ı çalışdıran portuqaliyalı çoxdan Avropada əlverişli variant axtarır. Jorje Mendeş də ona bu işdə yardım edir. Kriştiano Ronaldonun sabiq agentinin həm Lim, həm də Santu ilə münasibətləri yaxşıdı.
Ancaq Valensiyada yaşanan son kütləvi etirazlar bütün planları dəyişdi. Lim anladı ki, fanatların sevgisini qazanmaq lazımdı, Nunu Eşpiritu isə klubdan heç də yaxşı şəraitdə ayrılmayıb. Belədə yerli publikanın sevimlisi Baraxa ilə bağlı variant ortaya çıxdı.

Bildiyiniz kimi, var-dövləti 2,5 milyard dollar həcmində qiymətləndirilən sinqapurlu Piter Lim 2014-cü ildən “Valensiya”nın sahibidi. Komanda həmin vaxtdan bəri avrokubokların müntəzəm iştirakçısından La Liqanın autsayderinə çevrilib (hazırda 19-cu yerdədilər). İndi Valensiyada Limdən artıq dərəcədə nifrət olunan adam yoxdu. Azarkeşlər çoxdan onu klubdan qovmaqla bağlı aksiyalara başlayıb. Onlar 2021-in iyununda Limin göydələnə vurulan fotosunu yandırıblar, 2021-in dekabrında prezident əleyhinə aksiyaya 15 min adam qatılıb. Ötən mövsümün sonuncu günündə isə 10 min adam Lim əleyhinə yürüş keçirmişdi. Hərçənd bütün bu aksiyalar sinqapurli biznesmeni qorxutmur. Azarkeşlərlə bağlar o dərəcədə qopub ki, klubun sahibinin qızı Kim Lim fanatlardan ağızlarını yummağı və idarəçiliyə mane olmamağı xahiş edir: “Valensiya”nın bəzi fanatları məni və ailəmi söyür, lənətləyirlər. Ancaq onlar heç nəyi anlamırlar? Bu bizim klubdu, istədiyimizi edə bilərik. Heç kim bu haqda nəsə deyə bilməz”.

“Valensiya” yanvarın sonunda ölkə kuboku uğrunda mübarizəni də 1/4 finalda dayandırdı. “Atletik”lə oyundakı məğlubiyyətdən sonra yüzlərlə adam bu şüarları səsləndirdi: “Piter, sən yaramazsan, “Mestalya”dan rədd ol, əziyyət çəkməkdən bezdik”.

Eniş davam edir – komanda artıq düşmə zonasındadı
“Yarasalar”ın indiki durumu həqiqətən çox acınacaqlıdı.

• “Valensiya”nın qələbəsiz oyunlar seriyası 8-ə çatıb – komanda La Liqada ardıcıl 5 oyunda uduzub. Komanda hədsiz az qol vurur, 36 yaşlı əsas bombardir Edinson Kavani isə 3-4 həftəliyə zədələnib və belə həlledici dönəmdə oyundaşlarına yardım edə bilmir.

• Demək olar ki, ehtiyat qüvvə yoxdu. “Valensiya” yayda bəzi liderlərini satdı. Qışda isə Niko Qonsales – rotasiya üçün ən vacib futbolçu sıradan çıxdı. Qattuzo həvəslə gözləyirdi ki, Lim kimlərisə alacaq, ancaq ümidləri doğrulmadı. Belədə italiyalı mütəxəssisin istefa ərizəsi yazmaqdan başqa çıxış yolu qalmadı.

• Baraxa “yarasalar”ın 2011-ci ildən bəri 16-cı məşqçisidi. Bütün bu müddət ərzində komandada Unay Emeri, Ernesto Valverde, Marselino və Hari Nevill kimi ünlülər də çalışıb. Uzaqbaşı Marselinonun dönəmini nisbətən uğurlu saymaq olar – o da sinqapurlu biznesmenlə fikir ayrılıqları üzündən klubdan ayrıldı.