5 günlük fasilənin ardından fevralın 17-dən etibarən hazırlığa start verən “Qalatasaray” dünən Antalyaya yollanıb.

22 qat ölkə çempionu burda fevralın 26-na qədər toplanış keçəcək. İstanbul nəhəngi iki yoxlama matçı keçirməyi planlaşdırır. Rəqiblərdən birinin “Alanyaspor” olacağı dəqiqdi. Digər rəqib isə bəlli deyil. Bu qarşılaşmalardan əldə olunacaq gəlir yardım fonduna köcürüləcək.

Toplanışa yollananlar arasında yeni transferlər Sem Adekuqbe ilə Nikolo Zanyolo da var. Ən əsası siyahıda Fernando Musleranın da adına rast gəlmək olar. Onun komanda ilə toplanışa yollanması fanatları sevindirib. Belə çıxır ki, rəhbərlik təcrübəli qapıçının zədəsini sağaltmaq üzrə olduğunu bildiyi üçün son anda “Qaziantep”li Günay Güvənçdən vaz keçib. Xatırladaq ki, Muslera fevralın 5-də “Trabzonspor”la ev oyununda zədələnmişdi. Matçın sonlarına yaxın Anastasios Bakasetasın təhlükəli cərimə zərbəsinin qarşısını kəsərkən zədələnən 36 yaşlı qapıçı meydandan xərəkdə çıxarılmışdı. Onun təxminən 4-5 həftəliyə sıradan çıxdığı iddia edilmişdi. İş elə gətirdi ki, “Qalatasaray” faktiki Musleranın yoxluğunu hiss etmədi. Zəlzələ üzündən bir neçə həftəliyə təxirə salınan superliqa martın 3-də bərpa olunacaq. Həmin vaxt 24-cü turun oyunları keçiriləcək. “Cim-Bom” 24-cü turda səfərdə “Qaziantep”lə qarşılaşmalıydı. Anteplilər çempionatdan çəkildiyindən həmin tur “sarı-qırmızılar”ın oyunu olmayacaq. Komanda növbəti matçını martın 11-də, 25-ci tur çərçivəsində evdə “Kasımpaşa”ya qarşı keçirəcək. Qeyri-adi nəsə baş verməsə, Muslera həmin oyuna qədər tam sağalaraq start heyətində meydana çıxacaq. Qeyd edək ki, klub tarixində bir çox rekordları əlində saxlayan uruqvaylı qapıçı “Qalatasaray”da 12-ci mövsümünü keçirməsinə baxmayaraq, hələ də aparıcı oyunçulardan biri sayılır. Cari mövsümü çox inamlı keçirən və komandasının lider olmasında mühüm rol oynayan Muslera 21 superliqa matçında cəmi 16 top buraxıb və 9 oyunda qapısını toxunulmaz saxlayıb.