"Naxçıvan şəhərinin stadionunun yarım əsrə yaxın yaşı var. SSRİ dönəmində ölkəmizin ən yaxşı futbol məkanlarından biri sayılırdı. Stadion son dəfə 1987-ci ildə əsaslı təmir olunub. Müstəqillik illərində Muxtar Respublika təmsilçisi ölkə çempionatında cəmi 3 mövsüm çıxış edib. Komandanın güclülər dəstəsində çıxışı 1 il çəkməyib. Bütün bunlar da Naxçıvanda futbola marağı azaldıb. Son 30 ildə stadionda əsaslı təmir və yenidənqurma işləri aparılmayıb. Yalnız texniki otaqlar yaradılıb və oturacaqlar yenilənib. Bu sadaladıqlarım nəticəsində arena baxımsız vəziyyətə düşmüşdü. Bildiyiniz kimi, klub olaraq hədəflərimiz böyükdü. Qarşımıza elitaya yüksəlmək məqsədi qoyulub. Ona görə stadionda yenidənqurma, təmir və elita tələblərinə uyğunlaşdırmaq üçün işlər görürük. Qazonun yenilənməsiylə bağlı da müzakirələr aparmışıq. Təbii, yoxsa süni olacağı haqda fikirlər öyrənilir. Böyük ehtimalla süni örtük olacaq. Çünki Muxtar Respublikanın fərqli, ağır iqlimi var. Yayda 40-45 dərəcə isti, qışda isə 20-25 dərəcəyə qədər şaxta olur. Bu üzdən təbii örtüyü saxlamaq olduqca çətin və böyük məsrəfdi. Səs sistemləriylə bağlı işlər artıq bitmək üzrədi. İşıqlandırma sistemlərini yeniləyirik. Yaya qədər işlərin böyük hissəsini tamamlamağı planlaşdırırıq".