“Formula-1” üzrə dünya çempionatının iddialı komandalarından “Red Bull” 2023 mövsümü üçün maşınını təqdim edib. Maşın RB19 indeksi alıb. Nyu-Yorkda keçirilən təqdimat mərasimi çərçivəsində həmçinin komandanın 2026-cı ildə “Ford”la əməkdaşlığa başlayacağı elan olunub. Yeni mövsümdə “Red Bull”un şərəfini Maks Ferstappenlə Serxio Peres qoruyacaq.

Football-plus.az xəbər verir ki, ikiqat dünya çempionu Ferstappen bu arada yeni mövsümlə bağlı gözləntilərini bölüşüb:

“Mənim sevimli rəqəmim 3-dü. Bu üzdən 3-cü titulu qazanmaq üçün əlimizdən gələni edəcəyik. Belə nəticəyə çatmaq üçün yetərincə yaxşı səviyyədə olub-olmadığımızı bilmirəm, ancaq komanda bunun imkanları daxilində olduğuna inanır. Çox güclü mövsümdən sonra hədsiz motivasiyalıyıq, qarşıya qoyulan hədəfə çatmaq üçün tam gücümüzlə çalışırıq. Qış boyunca bazada olan hər kəs maksimal dərəcədə çalışır, mən də məzuniyyətdən qayıdandan sonra yalnız onun üçün çalışıram ki, mövsümə mümkün qədər yaxşı formada başlayım. Trassa çıxan kimi yaxşı nəticə göstərmək lazım gələcək. Son həftələrdə tədricən forma yığıram. Yenidən yarışa başlamaq əla olacaq”.

Ferstappen qarşıdakı mövsümdə hansı komandaların “Red Bull”a rəqib ola biləcəyi haqda sualı da cavablayıb:

“Mühakimə yürütmək çətindi, çünki mən “Mersedes” komandasının bir hissəsi deyiləm. Hər halda, bu il hər şeyi görəcəyik. Onlar maşını istədikləri kimi təkmilləşdirməyi bacarsalar, təbii ki, əsas rəqibimiz olacaqlar. “Ferrari”nin də güclü olacağını düşünürəm, amma nə dərəcədə – söyləmək çətindi. Heç şübhəsiz, son bir neçə il ərzində “Mersedes” özünün çox güclü olduğunu sübut etdi. Bundan başqa, onların yaxşı mütəxəssis komandası var. Amma komandamıza inanıram”.

Ferstappen daha sonra konkret adlara toxunub:

“Hemilton tarixin ən böyük sürücülərindən biridi. Təbii ki, maşın ona imkan versə, onda titul uğrunda mübarizə apara biləcək. Eyni sözləri Corc Rassell, Şarl Lekler, Lando Norris haqda da demək olar. Onlara çempionluq qazana biləcək maşın versən, bunu edə bilərlər. Belə bir maşınla əlavə təzyiqin gəldiyini başa düşmək vacibdi, çünki səhv edə bilməzsiz. Bununla belə, mən adını çəkdiyim pilotların istedadına arxayınam”.

Xatırladaq ki, 25 yaşlı niderlandlı 2022 mövsümündə ardıcıl 2-ci dəfə dünya çempionu oldu. “Red Bull” isə Mühəndislər kubokunu 5-ci dəfə qazandı.