Fernandes indi İngiltərə futbolu tarixinin ən bahalı oyunçusudu.

Onu heyətinə qatan “Çelsi” premyer-liqanın yeni rekordçusu sayılır. Paytaxt klubu 2021-ci ilin yayında Qrilişə görə rekord müəyyənləşdirən MS-ni arxada qoyub. Premyer-liqanın ən baha 10 transferi üzrə maraqlı məqamlarla tanış olaq.

* Nəzərinizə çatdırdığımız növbəti cədvəldə 1-ci, 5-ci və 10-cu ən baha keçid 2022/23 mövsümündə rəsmiləşib. Başqa sözlə, demək olar ki, 10 keçidin üçdəbiri cari mövsümdə baş tutub.
* Ən baha 10 transferin tən yarısını “Mançester Yunayted” reallaşdırıb. İngiltərə nəhəngi fransalı yarımmüdafiəçi Pol Poqbaya görə “Yuventus”a 105 milyon avro ödəməklə 2016/17 mövsümündə premyer-liqanın yeni rekordunu müəyyən etmişdi. Maraqlıdı ki, MY sonrakı illərdə aldığı heç bir oyunçu üçün 100 milyon avro xərcə düşməyib.
* İlk “10-luq”da premyer-liqanın ən iddialı 6 klubunun heç də hamısı təmsil olunmayıb. “Arsenal”ın ən çox xərc çəkdiyi Nikolya Pepe 80 milyon avro təzminat haqqı ilə 11-14-cü yerləri bölüşür. “Tottenhem”i daha çox xərcə salan Tanqi Ndombele isə 60 milyon avro ilə premyer-liqanın ən baha transferlərinin siyahısında 32-35-ci yerləri bölüşür.

Premyer-liqanın böyük qüdrəti
Yanvarda Avropanın “böyük beşlik” adlandırılan liqalarında transfer xərclərinə görə liderin İngiltərə olacağı gözlənilirdi. Premyer-liqanın 20 klubunun yeni oyunçular üçün ödədiyi təzminat rekord göstəriciyə bərabər olub. Maraqlı detallara nəzər salaq.
* Premyer-liqanın 20 klubunun ümumi xərci 829,81 milyon avroya bərabər olub. Bu, qitənin digər 4 aparıcı liqasında çəkilən xərclərin ümumi məbləğindən 3 dəfə çox olub.
* Fevralın 1-nə olan reytinqə əsasən bütün dünya üzrə 10 “top-liqa” sırasına ABŞ (yanvarda transferlərə 57,6 milyon avro xərclənib), Argentina (34 milyon), İngiltərənin 2-ci divizionu (28,3 milyon), Rusiya (27,4 milyon) və Portuqaliya çempionatı (27,3 milyon) da daxil olub. Hətta ilk 10 deyil, 20 liqanın yanvardakı transfer xərclərini nəzərə alsaq, İngiltərə premyer-liqası klublarının bu plandakı göstəricisi digər 19 liqanın ümumi xərcindən təxminən 250 milyon avro çox olacaq.
* Premyer-liqa 2022-ci ilin qışında da transferlərə xərclənən vəsaitin məbləğinə görə aşkar lider idi (345 milyon). Amma bir il əvvəl əsas izləyicisi olan İtaliya A seriyası (185 milyon) ilə fərq indiki kimi böyük deyildi. Onda 3-cü yeri ABŞ-ın yüksək liqası olan MLS, 4-cü yeri isə Rusiya premyer-liqası tuturdu. Rusiya çempionatı indi 9-cu yerdə olsa da, mövqeyini gücləndirə bilər. Belə ki, şimal qonşumuzda “transfer pəncərəsi” təxminən üç həftə sonra bağlanacaq. Daha 7 milyon avroluq xərc rusları ilk “5-liy”ə yüksəldəcək.
* “Böyük beşlik”də yanvar transferləri üçün daha çox xərcə düşən klubların siyahısı belədi: “Çelsi” (329,5 milyon), “Marsel” (40 milyon), Dortmund “Borussiya”sı (13,5 milyon), “Espanyol” (13,2 milyon), “Fiorentina” (12,5 milyon).
* Bu qış İngiltərənin yalnız bir sıra top-klubları futbolçu alğısı üçün böyük məbləğdə pil xərcləyib. Qeyd etdiyimiz kimi, “Çelsi” təxminən 330 milyon avro xərcə düşüb. “Arsenal” 60,3 milyon xərcləyərkən, MS, MY, “Tottenhem” və “Liverpul”un yeni oyunçular üçün ödədiyi ümumi təzminat yalnız 64 milyona bərabər olub. Bu məbləğin 42 milyonu Qakpoya görə PSV-yə ödəniş edən “Liverpul”un xəzinəsindən çıxıb.
* Premyer-liqada hazırda sonuncu yeri tutan “Sauthempton”un xərci (63 milyon) Almaniya bundesliqasının bütün klublarının ödədiyi ümumi təzminata (67,27 milyon) yaxın olub. Premyer-liqanın aparıcı sayılmayan bir sıra digər klublarının göstəriciləri də diqqətdən yayınmır: “Bornmut” 56,2 milyon, “Lids” 41,2 milyon, “Vulverhempton” isə 38,5 milyon avro xərcləyib.
* Dəyəri 11 milyon avrodan çox olan 37 transfer rəsmiləşib. Bu keçidlərdən 31-ni İngiltərə klubları reallaşdırıb.
* Qışın ən baha 19 transferi siyahısına İngiltərə ilə bağlı olmayan yalnız bir keçid düşüb: “Marsel” Vitinya Oliveyraya görə “Braqa”ya 32 milyon avro ödəyib.
* İngiltərə təmsilçilərini nəzərə almasaq, “Marsel” 5 aparıcı liqada hamıdan çox xərcə düşüb. Fransa klubu bu planda İspaniya La Liqası (31,88 milyon) və İtaliya A seriyasının (31,22 milyon) ümumi xərcini arxada qoyub. “Marsel” ümumi siyahıda yalnız İngiltərənin 7 klubundan geri qalıb.
* Amma premyer-liqada puluna qənaət edənlər də olub. Məsələn, “Brentford” Kevin Şadenin “Frayburq”dan icarəsinə görə yalnız 1 milyon avro ödəyib, “Everton” isə yanvarda yeni oyunçu almayan yeganə klubdu. Digər liqalarda transfer etməyən klublardan 4-ü Almaniya, 9-u Fransa, 11-i İtaliya, 13-ü isə İspaniya təmsilçiləridi. Maraq üçün xərcə düşməyənlərin sırasına PSJ, “Monako”, “Leyptsiq”, “Real”, “Barselona”, “Sevilya”, “İnter”, “Yuventus”, “Napoli”, “Latsio” və “Atalanta”nın daxil olduğunu da bildirək.