Kanselonun Mançesterdəki ilk ayları da asan olmayıb. “Yuventus”dan “Siti”yə gələndən (2019-un yayında 65 milyon avroya) sonra əvvəlcə maksimal dərəcədə başqalarıyla məsafə saxlayıb. Lokdaun bitəndən sonra kollektivə və oyuna inteqrasiya olmağa başlayıb. Pep həmin dövrü belə xarakterizə edir: “O, ilk vaxtlar tələblərimizlə ayaqlaşmırdı. Təklif edə bilmədiyimiz nəsə gözləyirdi. Ancaq qeyri-adi fiziki göstəricilərə malik yaxşı oğlandı”.

Daha dəqiqi, Kanselo gözləyirmiş ki, “Siti” ondan hücumlara fəal şəkildə qoşulan, hücuma genişlik qazandıran klassik sağ cinah müdafiəçisi kimi yararlanacaqlar. Kayl Uokerin yaxşı formada olması və Qvardiolanın “yalançı” fulbeklərə sevgisi başqa reallıq yaratdı: sağ yox, sol cinah, düz xətt üzrə təkanlar yox, orta sahəyə meyillənmək, əsas heyətdə daimi yer yox, Zinçenko və Mendi ilə rəqabət.

Kanselo buna bir neçə ay ərzində öyrəşdi, 2021-in əvvəlində yeni sxem uğurla çalışdı. Onda Qvardiolanın taktiki yerdəyişmələrindən sonea komanda premyer-liqada 15 oyunluq qələbə seriyası yaxaladı, turnir cədvəlinin ortalarından zirvəyə qədər irəlilədi.

Kanselonun bu roldakı tərəqqisi Filipp Lam ilə müqayisə olunmağa imkan verdi. Özü də kompliment məhz Lamı “Bavariya”da çalışdıran, onu “yalançı” fulbekə çevirən Qvardioladan gəldi: “Joze indi Lam mənim “Bavariya”mda oynadığı kimi oynayır. Lam müdafiənin cinahından dayaq yarımmüdafiəçisi mövqeyinə meyillənmək üçün əla oyunçu idi. Düşünməzdim ki, əvvəlcə yarımmüdafiənin ortasına meyillənən, ardından ordan hücum edən fulbek görəcəm. Joaoda da bu keyfiyyət var. Onun təbii mövqeyi sağ cinahdı, ancaq hər iki cinahda oynaya və istənilən ayağı ilə ötürmə verə bilər”.

“Siti” niyə portuqaliyalıya əvəz axtarmır?

ESPN-in iddiasına inansaq, “Siti” çətin ki Kanseloya əvəzedici axtara. Qvardiola belə hesab edir ki, sərəncamında yetərincə müdafiəçi var. Söhbət ilk növbədə klubun öz akademiyasının yetirməsi olan Riko Lüisdən gedir. Kanselo və Uoker ehtiyat oyunçular skamyasında qaş-qabaq tökdüyü vaxtlarda 18 yaşlı müdafiəçi parladı. Pep artıq onu “kiçik Lam” adlandırır – həqiqətən də bu iki futbolçu arasında oxşarlıq çoxdu.
Lam kimi Riko da cinah müdafiəçisidi, ancaq əslində həmin mövqedə oynamır. Lüis cinah müdafiəçisi yerində “Siti” üçün nadir hallarda görünən ssenaridə, yəni komanda meydanın özünə aid hissəsində müdafiə olunanda çıxış edir.

Eyni zamanda, nominal mərkəz müdafiəçiləri – Manuel Akanci, Con Stounz və Natan Ake də cinahlarda mövqeni qapaya bilər.

Football-plus.az