“Tranfer pəncərəsi”nin son həftəsinin ən gözlənilməz xəbəri budu: “Bavariya” Joao Kanselonu “Mançester Siti”dən icarəyə götürüb. Portuqaliyalı müdafiəçi ən azı mövsümün sonuna qədər bundesliqada oynayacaq. Kanselo artıq Münhendədi, tibbi baxışdan keçməlidi. “Bavariya” 70 miilyon avro ödəməklə onu almaq hüququna da malikdi.

“Arsenal”la oyundan əvvəl Qvardiola ilə “atışıb”

Maraqlıdı, “Mançester Siti” oyun və texniki xarakteristikasına görə unikal müdafiəçidən niyə imtina etsin ki? Joao ötən mövsüm premyer-liqanın rəmzi yığmasına düşüb. Bir il əvvəl isə İngiltərə çempionu ilə müqavilə müddətini 2027-ci ilə qədər uzadıb.

İngilisdilli medianın yaydığı insaydları toplayaq:

• DÇ-dən sonrakı 10 oyunun yalnız üçündə Kanselo “Siti”nin start heyətində görünüb. Və bunlar hamısı uğursuz olub: Mançester derbisində məğlubiyyət, Liqa kubokunda “Sauthempton”la oyunda iflas... “Siti”nin “Çelsi”yə qalib gəldiyi oyunda isə portuqaliyalı yalnız bir hissə meydanda olub və əvəzlənib. Yeri gəlmişkən, Qətər mundialının gedişində də Kanselo Portuqaliya yığmasının əsas heyətindəki yerini itirib.

• Kanselo narazığını gizlətmirdi. Məsələn, “Vulverhempton”la oyundan əvvəl başqa ehtiyat oyunçularla birgə isinmək əvəzinə skamyadan qalxmadı.

• İş hətta Qvardiola ilə söyüşməyə qədər gedib çıxdı. Ən ciddi münaqişə yanvarın 27-də “Arsenal”la ölkə kuboku çərçivəsində keçirilən oyundan əvvəl, Joze heyətə düşmədini biləndə baş verdi.

• Kanselonun oyun vaxtına taktiki dəyişiklik də təsir göstərdi. Baş məşqçi gənc Riko Lüisə əsas heyətdə şans verdiyindən və sağ cinah müdafiəçisi ilə bağlı cəsur interpretasiyaya əl atdığından sol cinah müdafiəçisindən daha mühafizəkar oyun tələb olunur. Həmin işin öhdəsindən isə Natan Ake əla gəlir.

• Kanselonun davranışı komandaya neqativ təsir göstərməyə başladı. Pepin dəfələrlə səsləndirdiyi prinsiplərə nəzər yetirək: “Elə adam deyiləm ki, “mənlə qal” deyim. Hər kəsin arzuları var. Adamlar getməyin ən yaxşı yol olduğunu hesab edirlərsə, getməlidilər. Oyunçulara gəlincə, onlar komandada narazıdılarsa, getməlidilər. Həyat çox qısadı”.

Football-plus.az