Birinci divizionda çıxış edən "Qaradağ Lökbatan"a yeni baş məşqçi təyinatı baş tutmayıb.
Komanda Araz Bağırovla danışıqlar aparsa da, razılığa gələ bilməyib. Gənc mütəxəssis bizimlə söhbətdə bunun səbəbini açıqladı:
"Qaradağ Lökbatan"la danışıqlarımız oldu. Maliyyə şərtləri ürəyimcə idi. Sadəcə, iki məsələ ilə bağlı narazılığım vardı. Klubun strukturu və baş məşqçi səlahiyətlərinin geniş olmaması prinsiplərimə uyğun deyil. Bu üzdən ortaq məxrəcə gələ bilmədik".
Qeyd edək ki, Araz Bağırov uzun müddət “Qarabağ”ın aşağı yaş qruplarında çalışıb. Onun son iş yeri isə “Sabah”ın U-15 komandası olub. Araz bəy hazırda “Araz Naxçıvan”ı çalışdıran Azər Bağırovun qardaşıdı.
"Qaradağ Lökbatan"ın “sükanı arxasında” Səbuhi Həsənov ola-ola, rəhbərliyin yeni baş məşqçi axtarışına çıxması maraq doğurmaya bilməz. Bunu nəzərə alıb ona da tribuna verdik:
"Birinci dövrədə həm Füzuli Məmmədov, həm də Rafael Əmirbəyov mənə kömək edirdi. Sağ olsunlar, yaxşı mütəxəssis və dostdular. Artıq Füzuli müəllim PRO kateqoriyasına sahibdi və aşağı yaş qrupu üzrə millinin məşqçisidi. Rafael müəllim də aşağı yaş qrupu üzrə yığmada koməkçi məşqçidi. Mən yeni ailə həyatı qurmuşam. Ona görə də bu aralar ailəmə daha çox diqqət ayırmalıyam. Bu durumu rəhbərliyə anlatdım, sağ olsunlar, məni anladılar. Çünki baş məşqçi daha çox diqqəti komandaya veməlidi. Bu səbəbdən klub yeni baş məşqçi axtarışındadı. Bəli, bütün proseslərin içindəyəm. Bir neçə məşqçi ilə danışıq gedir. Yaxın günlərdə bu məsələ həllini tapacaq".
ABDULLA İSMAYILOĞLU