Messinin rekord qıran şəkli necə çəkilib?
Lionel Messinin Argentina yığması ilə dünya çempionluğunu qazanandan sonra populyarlığının inanılmaz səviyyəyə qalxdığını və “instaqram”da bir çox rekordları alt-üst etdiyini xəbər vermişdik.
Messinin DÇ-dəki qələbəyə aid olan və 10 şəkildən ibarət olan tarixi paylaşımı artıq 73 milyondan çox “layk” yığıb!
Football-plus.az xəbər verir ki, Leonun həmin o rekord qıran paylaşımındakı birinci şəkli çəkən britaniyalı fotoqraf Şon Botterill Almaniyanın “Bild” nəşrinə açıqlamalar verib. O, şəklin yaranma tarixçəsi haqda danışaraq bunları deyib:
“Messi mükafatlandırma mərasimindən sonra uzun müddət ailəsi ilə birlikdə oldu. Amma sonra birdən-birə ayağa qalxaraq onun lehinə təzahürat səsləndirən fanatların olduğu tribunanın qarşisina gəldi. Mən düz qapının arxasında, reklam lövhələrinin yanında argentinalı jurnalistlərlə birlikdə əyləşmişdim. Sonra hər şey ani baş verdi. Messi birdən biz tərəfə gəldi. Aquero onu çiyninə götürdü və Messi faktiki düz mənim önümdə sevinməyə başladı. Bu şəkilin bu qədər populyarlıq qazanmasına bəzən inanmağım gəlmir. Onu artıq 73 milyon insan bəyənib. Bu dəlilikdi! Bu, Britaniyanın əhalisinin sayından daha çoxdu. Əslində Messinin rəsmi təmsilçiləri şəkli “instaqram”a bir qədər balacalaşdıraraq qoyublar. Yəni kənarlarını götürüblər. Bu ağıllı addımdı. Çünki indi şəkildə bütün diqqət yalnız Messiyə və kuboka yönəlir. Amma mən orijinal şəkli daha çox bəyənirəm. Orda həmin vaxt yaşanan atmosferi, xaosu daha yaxşı hiss etmək olur. Ətrafdakılar hamısı əllərində telefonla Messini çəkirdilər”.
