Srağagün keçirilən “Vaşinqton” – “Detroyt” oyununu izləyənlər arasında Qordi Hounun oğulları – Mark və Marti də var idi.

Təbii ki, onlar paytaxt klubunun rusiyalı ulduzu Aleksandr Oveçkinin MHL-dəki 801-ci qoluna şahidlik etmək istəyirdi.

Football-plus.az xəbər verir ki, Ovi belədə Hounun nəticəsini təkrarlamış olacaqdı. Ancaq 2-ci periodda 37 yaşlı hokkeyçinin zərbəsi dirəkdən döndü və təntənələr ən azı növbəti oyuna qədər təxirə salındı. Oveçkin komandasının qələbəsi ilə bitən oyundan sonra qonaqlarının könlünü xoş etmək üçün onlara xatirə şəkli çəkdirdi və hər birinə avtoqraflı hokkey çubuğu bağışladı.

Xatırladaq ki, kanadalı Hou 1946-71-ci illər aralığında və 1979/80 mövsümündə MHL-də çıxış edib, bu müddətdə 801 qol vuran əfsanə 2016-cı il iyunun 10-da – 88 yaşında dünyasını dəyişib. MHL-in qol rekordu (894) isə bir başqa kanadalı əfsanəyə - Ueyn Qretskiyə məxsusdu.