"Finala layiq olan komandalar gəldi. Göstərdiyi oyun, performans ilə həm Argentina, həm də Fransa finala layiq idi. Mən hələ mundial başlamamış Argentinanın Braziliyaya qədər gəlib çıxacağını demişdim. Yəni bu komanda ancaq yarımfinalda Braziliya ilə oyunda büdrəyə bilərdi. Lakin elə oldu ki, Xorvatiya Braziliyanı məğlub etdi və Argentinaya rəqib oldu. Əlbəttə, Argentinanın heyətində oyunun taleyini həll edəcək futbolçu var. Bu da, heç şübhəsiz, Messidi. Lakin Fransada belələri çoxluq təşkil edir. Mbappe, Qrizmann, Jiru, Dembele də oyunun taleyini həll edəcək futbolçulardı. Amma Argentinada bunların sayı birdi. Digər oyunçuların əməyini yerə vurmaq istəməzdim, hamısı Messini topla təmin edir. Finala layiq oyun görəcəyik. Braziliya taktiki gedişin hesabına uduzdu. Mərakeşin də oturuşmuş müdafiəsini nə İspaniya, nə də Portuqaliya yara bildi. Amma Fransa bundan nəticə çıxararaq rəqibinə qalib gəldi. Demək olar ki, Fransa da taktiki gedişin hesabına qələbə qazandı. Bu çempionat sensasiyalı oldu. Finalda da, yenə deyirəm, favoritim Argentinadı. Çempionat başlamadan Argentina azarkeşi olmuşam, o da əsasən Messiyə görə. O ki qaldı siyasi məsələlərə, düzdü, deyirlər ki, futbol siyasət deyil, idmanı siyasətə qatmaq olmaz. Lakin istər-istəməz insan azarkeşdən öncə vətəndaşdı. Bu səbəbdən hansısa bir ölkə siyasi baxımdan bizə qarşı olubsa, vətəndaş kimi bizim də içimizdən onlara istənilən sahədə qarşı çıxmaq gəlir. Ancaq bu da sivil formada baş verməlidi. Yəni mən belə başa düşürəm".