Misli premyer-liqasının 17-ci turu "Şamaxı" - "Zirə" qarşılaşmasıyla start götürdü. "Aslanlar"ın kapitanı Elvin Məmmədov zədə səbəbindən oyunu buraxırdı. Buna rəğmən, tribunada ayaqüstə komanda yoldaşlarını mübariz və ehtiyatlı oyuna səsləməklə diqqəti çəkirdi.

Football-plus.az olaraq fürsətdən yararlanıb oyundan sonra onunla danışdıq.

- Bu gün zədə səbəbindən matçda iştirak etmirdin. Zədən ciddidi?
- 10 gündü zədədən əziyyət çəkirəm. Şükürlər olsun, çox da ciddi deyil. Qış təlim-məşq toplanışının startına kimi sağalacam.

- Yəni "Neftçi"ylə növbəti görüşü də buraxacaqsan?
- Bəli.

- Amil Yunanov artıq komanda ilə məşqlərə başlayıb. Onun qayıdışı faydalı olacaq?
- İstənilən komandada təcrübəli futbolçuların sıraya dönməsində ancaq fayda var. Amilin potensialına yaxşı bələdik. İnanıram ki, qış toplanışında formasını tam bərpa etməklə komandamızdan köməyini əsirgəməyəcək.

- Bu gün kapitan yox, çılğın azarkeş kimi komandaya dəstək verdin…
- "Zirə" mükafatçılar sırasında yer almaq üçün çarpışan iddialı komandadı. Onlarla qarşılaşmanın ağır keçəcəyini bilirdik. Neçə oyun idi uduzmurduq, bu seriyanı davam etdirmək üçün alışıb-yanırdıq. Komanda yoldaşlarım meydanın hər qarışı uğrunda mübarizə apardı. Mən də onlara əlavə motivasiya vermək üçün bu gün kənardan dəstək olmağa çalışdım.

- Çempionatın ilk yarısının son turunda "Neftçi"ylə səfər oyununa çıxacaqsız. "Ağ-qaralar"dan da xal qoparmağı düşünürsüz?
- Biz hər oyuna final kimi baxırıq. "Neftçi" çempionatın ən güclü komandalarındandı. Amma biz onlara qarşı da mübarizə aparacağıq. Komanda şəklində döyüşsək, bütün rəqiblərdən xal və xallar qopara bilərik.

- Necə düşünürsən, qış fasiləsində yeni futbolçuların cəlb olunması komandanın gücünə güc qatacaq?
- Transfer çalışmaları rəhbərliyin və məşqçilərimizin səlahiyyətində olan işdi. Strategiyamız bəllidi, yerli futbolçularla çempionatda çıxış edəcəyik. Məhz buna görə də sizin vasitənizlə öz komandalarında əsasən ehtiyatda qalan gənc futbolçulara səslənirəm. Daha çox oynamaq, yaxşı forma yığmaq üçün “Şamaxı”ya keçsinlər. Komandamız gənclərin daha yaxşı performans göstərməsi və iddialı klublara transferi üçün ən yaxşı təcrübə bünövrəsidi.

- Dünya çempionatı sona yaxınlaşır. Səncə, hansı komandanın çempion olması realdı?
- Bu mundial sürprizlər, sensasiyalar ila diqqəti çəkir. Ona görə kimin daha şanslı olduğunu demək çətindi. Mən Argentinaya azarkeşlik edirəm.

- Heç kimin gözləmədiyi halda Mərakeş millisi güclü rəqibləri sıradan çıxarmaqla yarımfinala qədər irəliləyib. Nə vaxtsa Azərbaycan yığmasından da belə sıçrayış görə bilərik?
- Düzdü, çoxları Mərakeşdən belə yüksək performans gözləmirdi. Amma Afrika təmsilçisini zəif saymaq doğru olmaz. Onların heyətində İngiltərə premyer-liqasında çıxış edən oyunçular var. Odu ki, Mərakeş fiziki, texniki və psixoloji cəhətdən hazırlıqlı kollektivdi. Futbol xarakter, kişilik oyunudu. Millimizin son görüşlərinə nəzər yetirsək, inkişaf hiss olunur. İnanıram ki, bu inkişafı davam etdirsək, yaxın gələcəkdə böyük turnirlərə vəsiqə qazanacağıq.

ABDULLA İSMAYILOĞLU