“Formula-1” komandalarında dəyiş-düyüş başlayıb
“Formula-1” üzrə dünya çempionatında mövsümlərarası fasilə dövrüdü.
Football-plus.az xəbər verir ki, fürsətdən yararlanan komandalar 2022 mövsümünün nəticələrinə nəzər salır, dəyişiklik edirlər.
8 xalla Mühəndislər kubokunda sonuncu yeri tutan “Uilyams” rəsmi saytında Yost Kapito və Fransua-Xavyer Demayson ilə əməkdaşlığı dayandırdığını elan edib. Kapito Britaniya komandasında rəhbər, Demayson isə texniki direktor vəzifəsini tuturdu. Onların əvəzləyicilərinin adı yaxın günlərdə açıqlanacaq.
Fransalı mütəxəssis Frederik Vasser isə “Alfa Romeo”nun rəhbəri postundan ayrılıb. Komandanın sosial şəbəkədəki paylaşımında bu sözlər yer alıb:
“Fred, sağ ol! Hara getməyindən asılı olmayaraq, biz səni dəstəkləyəcəyik”.
54 yaşlı Vasser hazırda DÇ-də “Alfa Romeo” adı altında çıxış edən “Zauber”də rəhbər vəzifəyə 2017-ci ildə gətirilmişdi. “Alfa Romeo” 2022 mövsümündə 55 xal toplamaqla Mühəndislər kubokunda 6-cı yeri tutub. Artıq Vasserin yeni iş yeri də bəllidi. O, gələn il yanvarın 9-dan “Ferrari”nin rəhbəri kimi çalışacaq. Xatırladaq ki, Mattia Binotto İtaliya klubundan ayrılmağa qərar verdiyinə görə onun yeri vakantdı. “Ferrari”nin baş direktoru Benedetto Vinya komandanın rəsmi saytına verdiyi açıqlamada belə deyib:
“Fred Vasseri “Ferrari”nin rəhbəri kimi salamlamaq imkanına görə çox şadıq. O, bütün karyerası boyunca təcrübəli mütəxəssis kimi texniki üstünlüklərini pilotların ən yaxşı keyfiyyətlərini üzə çıxarmaqla birləşdirib. Belə yanaşma və onun liderliyi “Ferrari”ni ikiqat enerji ilə irəli aparmaq üçün bizə lazım olan keyfiyyətdi”.
Xatırladaq ki, “Ferrari” son mövsümdə 554 xalla Mühəndislər kubokunda 2-ci yeri tutub, “Red Bull” isə 759 xalla çempion olub.
Digər xəbərlər
