Yunis Hüseynov: “Neftçi”nin bu durumunun tərəfdarı deyilik”
“Neftçi”nin və millinin sabiq futbolçusu Mahir Şükürov ötən sayımıza açıqlamasında klubun hazırkı durumuna toxunmuşdu.
Football-plus.az xəbər verir ki, onun fikrincə, “ağ-qaralar”ın pis vəziyyətdə olmasının günahkarlarından biri də komandanın veteran futbolçularıdı. Şükürov onların problemləri qabartmadığını, bunu isə qorxduqlarına görə etmədiklərini söyləyib.
“Football-plus.az” saytı olaraq məsələ ilə bağlı Yunis Hüseynovun fikirlərini öyrəndik:
“Mən həmişə bu məsələ ilə bağlı fikirlərimi bildirmişəm. Saytlarda, telekanallarda həmişə çıxış edirəm. Biz nə varsa, onu deyirik. Mütləq pisləməli deyilik ki. Əlbəttə, “Neftçi”nin bu durumunun tərəfdarı deyilik. Biz də bilirik ki, komandada iş getmir. Ömrümüzü “Neftçi”də qoymuşuq, bu vəziyyət isə bizi heç qane etmir. Mahir Şükürovun fikrinə hörmətlə yanaşıram. Amma veteranlar “Neftçi” haqda fikir bildirir. Yaxşı olanda “yaxşı”, pis olanda “pis” deyiləcək. Heç kim yaxşıya “pis”, pisə “yaxşı” demir. Hansı veterandan soruşsaz, fikrini bildirər. Yəqin idman jurnalistləri onlara zəng etmir, fikirlərini öyrənmir. Veteran zəng edib deməyəcək ki, məndən müsahibə al. Sağ olsunlar, həmişə mənim fikrimi soruşurlar, danışıram. Amma gərək başqa veteranların da fikrini öyrənsinlər. Təbii ki, “Neftçi”nin durumu mənə də pis təsir edir. Amma burda günahı sırf veteranların üstünə atmaq olmaz. Veteran nə etsin? Mahir özü də çoxdan mediaya danışmırdı. Sadəcə, son günlər onun açıqlamalarını gördüm. Deməli, zəng ediblər, fikrini söruşublar ki, o da danışıb”.
ŞAİR ABDULLA
Digər xəbərlər
