Maşallah Əhmədov "Neftçi"nin baş məşqçisinə 24 saat vaxt verdi
“Neftçi”nin və millinin sabiq futbolçusu Mahir Şükürov ötən sayımıza açıqlamasında klubun hazırkı durumuna toxunmuşdu.
Football-plus.az xəbər verir ki, onun fikrincə, “ağ-qaralar”ın pis vəziyyətdə olmasının günahkarlarından biri də komandanın veteran futbolçularıdı. Şükürov onların problemləri qabartmadığını, bunu isə qorxduqlarına görə etmədiklərini söyləyib.
“Football-plus.az” saytı olaraq məsələ ilə bağlı Maşallah Əhmədovun fikirlərini öyrəndik:
“Mən “Neftçi”nin baş məşqçisinə 24 saat vaxt verirəm ki, Azərbaycanı tərk etsin. Onun futboldan anlayışı yoxdu. Gedib öz ailəsi ilə məşğul olsun. İkincisi, sözüm Kamran Quliyev, Zaur Əzizov və orda yer alan başqalarına aiddi. “Neftçi” rəhbərliyində Maşallah Əhmədov, İsgəndər Cavadov, Asif Əliyev kimi futbolu bilən adamlar olmalıdı. Hazırda “Neftçi”nin nəinki birinci və ikinci, hətta üçüncü yeri tutması da sual altındadı. “Qarabağ”la oyun da biabırçılıq idi. Çingiz Abdullayevin, Fərhad Bədəlbəylinin xətrini çox istəyirəm. Amma onlar futbol adamları deyil, gedib öz işləri ilə məşğul olsunlar. Mən Rövşən Nəcəfi dəstəkləyirəm. Lakin Müşahidə Şurasında gərək futbol adamları olsun. Bunlar da olsun, amma sabiq futbolçular çoxluq təşkil etməlidi. Məhz veteranlar bu işləri həll etməlidi. İnsanlar ancaq baxırsa, biz görürük, təhlil edirik. “Neftçi”ni ayağa qaldırmaq üçün futbol ulduzlarına, veteranlarına yer vermək lazımdı. Ümumiyyətlə, ordakı rəhbərlik istefa verməlidi. Rövşən müllimə mən təşəkkür edirəm ki, bu vəzifəyə gəldi. Komandaya legioner gətirirlər. Lakin o ancaq ehtiyatda oturur. Legioner də ehtiyatda oturar? Özümüzdə futbolçular var. Azərbaycan komandasısansa, azərbaycanlılardan istifadə etməlisən. “Neftçi”yə kim kömək etməlidi? Təbii ki, sabiq futbolçuları. Bunlar isə heç kimi saymır, bilmirlər ki, futbol mütəxəssisi nədi. Heç adam ata-anasını yadından çıxarar? Neçə illərdi özbaşınalıq edirlər. “Neftçi”nin Müşahidə Şurasında futbolçu ancaq Səməd Qurbanovdu. Allah cansağlığı versin, ancaq o da heç nəyi həll etmir. Səməd ordadı, istəyirəm ki, onun yanında Maşallah, İsgəndər və başqaları olsun. Cənab prezidentə də müraciət etmək istəyirəm. Futbolumuzun başında futbolçular olsun ki, bu idman növü də inkişaf etsin. Yalnız “Qarabağ”dı başımızı uca edən. Allah onlara, Qurbana cansağlığı versin. “Neftçi”yə ya Əsgər Abdullayevi, ya da Tərlan Əhmədovu gətirmək lazımdı. Yunis Hüseynov, Nazim Süleymanov var, onları yaddan çıxarmaq olmaz axı. Onlar bizim tariximizdi. “Neftçi”nin korifeyləri klubun indiki rəhbərliyindən inciyib. Bizə milli qürur, ruh, azərbaycanlı oğlu, yerli baş məşqçi lazımdı”.
ŞAİR ABDULLA
Digər xəbərlər
